Nongpoh, Nailur 29: Ka long ka jingkmen bad ka jingai mynsiem ia ki samla kynthei kiba don ia ka sap ialehkai football ka them Ri Bhoi District, ha kaba sa ar ngut ki thei ialehkai football na kane ka thain ki la shah jied ban mihkhmat ia ka jylla Meghalaya ha ka Junior Girls National Football Championship 2023 kaban sa sdang naduh ka 2 tarik haduh ka 15 tarik u Nailar ha ka jylla Rajasthan.
Kine ki arngut ki thei ialehkai football kiba la shah kynthup ha ka kynhun jong ka jylla Meghalaya ki kynthup ia ka Daphishisha Syngkli bad ka Ibashongkun Shylla kiba dei ruh ki thei ialehkai kiba pyntbit hapoh ka Lyntijam football centre kaba don ha ka thain Nongpoh.
Ha ka jingiakren bad u Bah Sumarlang Swer, u ba dei u Coach ka Lyntijam Football Centre, u la pyntip, ba ka long shisha ka jingkmen kaba khraw ia ka kynhun ai jinghikai ha ka liang ka football ba kine ki ar ngut ki samla kynthei ki la iohlad ban mihkhmat ia ka jylla Meghalaya ha ka lympung ialehkai football jong ka National Level jong ka Junior Girls National Football Championship 2023.
U la ong ruh, ba kine ki arngut ki samla kynthei ki dei ruh kiba la mihkhmat ia ka Saiden Secondary School ha ka jingleit mihkhmat sha ka lympung jong ka National Level Subroto Mukheerjee Cup kaba la long hapoh ka nongbah Delhi.
“Ka long shisha ka khubor kaba ai mynsiem ia ki samla kiba don sap ha ka kam ialehkai football kiba dang pyntbit shuh shuh ialade hapoh ka Lyntijam Football Centre hadien ka jingshah jied jong kine ki arngut ki thei ialehkai football jong ka Ri Bhoi District”, ong u Bah Sumarlang Swer.
