Shillong, Nailur 27: U Chief Executive Member ka KHADC Bah Pyniaid Sing Syiem hynne ka sngi Balang ula pyntip ba ka Sorkar Pdeng kala aiktien ba kan sa pyllait noh iaka song pisa jong ka Tied bad Untied Grant ka KHADC kaban kot sha ka T.200 Klur.
“Tang ka pisa kaba sah ban pyllait sha ka KHADC kaba dei jong ka Development Fund ka long T.2 Klur lyngba ka Fifteen Finance Commission bad kane ka song pisa ka kynthup ia ka Tied bad Untied Grant” ong u Bah Pyniaid Sing Syiem haba iakren bad ki nongthoh khubor.
Ula ong, ba ia kane ka pisa la khmih lynti ban ioh hashwa ka shuti puja.
U CEM u iathuh ba ki kam kiba lah ban pyntrei lyngba ka Tied Grant ki kynthup ia ka jingpynioh umbam umdih, ka khuid ka suba, ka koit ka khiah bad kiwei kiwei bad kane ka song pisa ka dei ka bym lah satia ban pyndonkam ha kaban tei jingtei ne Building.
U iathuh ba ki jingtei ba kynthup naduh ki Iing ne ki Ophis Drbar Shnong, ki jingtei ha ki skul, ban shna ia ki iew bad kiwei kiwei ki hap hapoh ka Untied Grant.
U CEM u pyntip ruh ba ka KHADC ka don ia ka jingthmu ban shna noh ia kawei ka Traditional Music Institute ka ban kyntiew ia ka sap ka phong jong ki samla da ki jinghikai pyntbit ialade ha ka tem, ka rwai ne shad kat kum ka riti tynrai jong ka Jaidbynriew. U iathuh ba ia kane ka Institute yn sa tei lyngba ka Untied Grant.
Nalor kane, u pyntip ba ka Council kala pyntreikam ruh mynta ia ka eGram Swaraj Portal la jan shibnai ka ban pynsuk bad pynaram ia ka jingtreikam jong ka Council haba iadei bad ki kam ba hap iatreilang bad ka Tnad District Council Affairs ka Sorkar Jylla lem bad ka Ministry of Panchayati Raj, Delhi.
Ha kajuh ka por, u CEM u pyntip ba ka Sorkar Jylla kala pyllait ia ka khajna ba T.10 klur lyngba ka Minor Mnerals bad hynnin ka sngi kala pyllait biang sa T 4 klur. U iathuh ba shen ka Sorkar kan sa pyllait biang sa ia ka khajna jong ka Tnad Transport bad ka Major Mineral ka ban kot sha ka T. 30 klur.
