Da u Donbok Wanniang
Shillong, Nailur 26 : Ka Meghalaya ka dei shisha ka Ri bala kyrkhu U Blei, ka Ri kaba don ia ka spah ba kyrhai jong ka mei mariang ha kat shaba phai ki khmat. Kyrpang eh ia ka Ri-lum Khasi bad Jaintia, kaba dang buhrieh ia bun bah ka spah jong ka mariang kaba hap ban iawad bad iangam ban lap ia ki.
Ka Ri-lum Khasi Jaintia ka dei kawei na ki jaka kaba la don ha ka map jong ki kam shangkai pyrthei da ka jingdon ia ki krem ki kroh ba bun jait bun rukom, ki lum ki wah kiba ithiang, ki kshaid kiba noh rymphum, kiba pyniap biej ia u khun bynriew ha satlak ka pyrthei.
Ka jingwankai jong ki briew na shabar ka Jylla kala nang kiew ha ka Jylla katba nang iaid ki snem namar ka jinglap thymmai ia ki jaka jngohkai kiba ithiang ha sawdong ka pneh jong kane ka Bri u Hynniewtrep.
Ka Sohra ka dei ka jaka jngohkai kaba nyngkong eh hapoh ka Jylla bad kat haduh kine ki sngi, kane ka jaka kam pat ju pynsngewsih ia ki nongshangkai kiba la poi iuhkjat ha ka namar kat shaba phai ki khmat, phin iohi ia ki kshaid kiba noh rymphum, ki krem ki kroh kiba itynnad mynta leit sha ki jingkieng diengjri kiba la pawnam ha satlak ka pyrthei.
Hynrei kumba la kdew haneng, ki dang don pat shibun ki kam phylla ka mariang ha kane ka Thain kaba u khun bynriew um pat lap satia bad don ruh kiba dang shu lap shen, kiba pynsah ha ka jinglyngngoh, pyniap biej bad pynlong ia u briew ba la iohi, ban kwah leitkai bad iuhkjat ha kine ki jaka.
Kawei na kine ki jaka jngohkai ba dang shu lap shen ka dei ka pung jngi bala pynwandur hi da ka mei mariang (Natural Swimming Pool) kaba don ha syngkai jong ka Kshaid bala tip kum ka Kshaid Demseiniong. Kane ka Swimming Pool ka iar hapdeng 12-15 phut bad ka jylliew kumba 8 phut eiei.
Kane ka jaka ka don ha ka Shnong Laitmawsiang, Sohra, kaba jngai tang kumba 48.5 Km na Nongbah Shillong. Kane ka kshaid ka don ha shiteng riat jong ki Lum kiba don ha ka shnong Laitmawsiang, kaba hap ban iaid kjat kumba 30 minit haba hiar bad 1 kynta eiei haba wanphai pat sha jrong.
Ban poi sha kane ka swimming pool bad ka kshaid, hap pat ban iaid na kawei ka jaka jngohkai ba khring bha ia kaba la tip kum ka ‘Garden of Caves” kaba don ha kane hi ka shnong.
Kumba long mynta hi, katto katne eh na ki trai Jylla kiba la poi sha kane ka jaka khamtam ki samla ba ju sngewtynnad ha ka jngi (Swimming) hynrei kiba bun hi kim pat ju bna ne tip ba kum kane ka kshaid ka don hangne ha Ri-lum Khasi Jaintia.
Pat da slem mynta, ka Shnong Nongnah South West Khasi Hills, kala khring bha ia ki nongshangkai da ka jinglap ia kawei ka Swimming Pool ha pdeng jong ka Riat. Kane ka jaka kala khring bha ia ki nongjngi na kylleng ka Jylla bad wat kiba nabar ruh kumjuh ban ialeit iasum iajngi pynngad ha kane ka pung shiteng riat kaba lah ban ong ba ka dei ka pung jngi kaba ima tam ha ka pyrthei (most dangerous Natural swimming pool).
