Shillong, Nailur 26 : Ka Tnad Public Health Engineering (PHE) kala pan biang sa T. 66 klur ka pisa ban lah pyndep noh ia ka Greater Shillong Water Supply Scheme (GSWSS) Phase-III kaba la ap la slem bha.
Haba pyntip ia kane hynne ka sngi ba-ar, u Myntri ka Tnad PHE Marcuise N Marak ula ong ba ka jingpynlut ia kane ka project kala nang kiew namar ka jingslem ban pyndep ia ka naduh u snem 2008.
“Ngi la pan biang sa T. 66 klur ban lah pyndap ia ka jingkiewdor. Kane ka dei kaba hap ban bei da ka Sorkar Jylla” ula ong haba bynrap ba kumba T. 300 klur la mang baroh ban pyntreikam ia kane ka project.
U Marcuise ula pyntip ruh ba ka GSWSS-III kala slem namar kiba bun ki daw kynthup ka jingduna pisa.
“La mang tyngka ia ka ha u snem 2008. Hashuwa ban mang pisa, ngi la khot ia ka tender bad la aiti ruh ia ka kam ban pyntrei. Ia ka installment ba nyngkong lah dep ban pyllait hynrei hadien, ki installment kiba bud kila slem bha namar ka jingpyllait pisa slem da ka Sorkar India bad ruh ka jingkylla ha ki nongpeit ia ka project…ta ka daw kala slem” ula ong.
Ula ong ba kawei pat ka daw ka long namar ba ka PHE kam shym la ioh jingbit na ka Tnad Public Works Department (PWD) ban siang ia ki pipeum na ka bynta ban sam um sha ki 12 tylli ki Zone ha ka Nongbah Shillong.
“Ngi ka khot ia ka tender. Ha ki 12 tylli ki Zone, ki pipe um kila hap ban iaid lyngba ka surok PWD. Ka Tnad kam shym lah ioh ia ka jingbit ba donkam ha katei ka por ban pyniaid ia ki pipe naka surok. Kane ruh kala bam ia ka bor bad nangta sa ka jingbit na ka Tnad Forest ruh kala slem bad ka Contonment Board ruh kumjuh”.
Nalor kane, u ong ba ka jingbym lah jong ka Tnad ban ioh jingbit na ka Hima Mawphlang ban shna ia ka pumping station ha ka jaka ba marjan bad ka Wah Umiew ruh ka dei kawei ka daw ba pynslem ban pyndep ia ka GSWSS-III.
U pynpaw ba ka Tnad ka khmih lynti ba ka Hima Mawphlang kan sa ai jingbit noh ha ka taiew ban wan ban lah pyntrei noh shaid shaid ia ka kam.
“Lada ngi ioh ia ka jingbit, ngi kyrmen ban pyndep noh ia ka GSWSS-III hapoh u bnai Nohprah mynta u snem” ula ong.
