Shillong, Nailur 25 : Ki paidbah ka East Jaintia Hills, kila pynlong jaka thung kba, khwai dohkha bad iashongkai pynbyrngia ha ka surok National Highway-6 ha Khliehriat hynne ka sngi Nyngkong, namar ka jingmynthi palat jong ka National Highway Authority of India (NHAI) ban maramot ia kane ka surok kaba la sniew bad jot rathai.
Kane ka sienjam kala mih hadien ba ki jingkyrpad jong ki kynhun Sengbhalang kynthup ka Khasi Students Union (KSU), Jaintia Students Movement (JSM) bad kiwei kiwei, ban maramot noh ia kane ka surok, kam shym la seisoh satia.
Kine ki nongiakhih bala lamkhmat da ka KSU, kala ioh ia ka jingkyrshan na kiwei pat ki Sengbhalang bad ka Synjuk ki Waheh Chnong ka East Jaintia Hills District.
Ki Nongiakhih kila pynlong jaka thung kba ha ki thliew ktieh jong ka surok bad sei la ki ryngwiang ban khwai dohkha ha ki thliew ktieh kiba heh ba syriem kum ki pung.
Nalor kane, kine ki nongiakhih kila iasei ruh ia ki tarpar bad iasiang ha kane ka surok ban pynlong kum ka jaka iashong kai byrngia bad jaka pynjah ia ka jingjrem met.
Ki Khynnah skul kila mih iashimbynta lang bad rah ia ki placard kiba kynthoh tyngeh ia ka NHAI. Kawei na kine ki jingthoh ka kynthoh “Highway Robbery ! NHAI, reduce toll, increase quality” ne “Nongtuh surok Highway! NHAI pynduna ia ka khajna, trei pynbha shuh shuh ia ki surok”.
U President ka KSU Narpuh Circle KS Suchiang ula ong ba kane ka sienjam ka dei ka dak jong ka jingkut noh ka jingaipor jong ka Union bad ki paidbah kila ngiah shoin ia ka jinglong mynthi ka NHAI ha kaban maramot ia kane ka surok la jan shisnem mynta.
Wat ki kynhun ki shipai Indian Army kiba poi iaid lynti na katei ka jaka, la kyntu ba kin phai noh bad wad ia kawei pat ka lynti ba kin iaid sha ka jaka ba ki thmu ban leh, ia kaba ki shipai kila mynjur.
Ki kali Tourist ruh ym shym la ioh satia wat tang kawei ruh ha kane ka Highway naba ki Seng bapher bapher jong ki nongniah kali Tourist kila kyrshan ia kane ka jingiakhih.
Ki Sengbhalang kila kyntu ruh ia ki paidbah ba kin nym iasei satia iala ki kali nala iing naduh ka por 7 baje janmiet haduh 5 baje mynstep kum ka dak ka jingbteng jong ka jingiakhih.
