Shillong, Nailur 19: Ka East Khasi Hills kala register case ia palat 5196 tylli ki kam bymman ha kine ki laisnem bala leit noh naduh u 2020 haduh u 2023.
Ia kane la pyntip da u Symbud Myntri Rangbah ka Jylla ba khmih iaka kam Pohiing (Police) Bah Prestone Tynsong haba jubab ia ka jingkylli bala buh da u MLA ka UDP na Nongpoh Bah Mayralborn Syiem hapoh ka Iingdorbar Thaw Ain hynne ka sngi Ba-ar.
U Bah Mayral ula pan ia ka jingkular jong u Symbud Myntri Rangbah halor ka jingdonkam ban pynsted ia ki jingtohkit bad chargesheet ia ki case kiba dang sahteng.
Ula ong ba ki don palat 2821 tylli ki kam bymman kiba la dep register case ha kine ki lai snem ha kaba tang 84 tylli ki dei kiba la pynngat ha ki jingpynsajia.
Haba jubab, u Bah Prestone ula kubur ba i pynduh mynsiem shi katdei eh namar ka shimpor palat ia ki case ba kin poi ha ka khep ban ai jingpynsajia.
Hynrei ula ong ba ka tnad Pulit kala ialeh kat kaba lah ban pyndep kloi ia ki kam ba iadei bad ka jing chargesheet bad ban aiti ruh sha ka Iingkashari ba kan pyndep ia ka jingbishar ia kine ki case.
“Nga kwah ban kular ia ka Iingdorbar ba ki Pulit bad ka Sorkar kin ym shong kli kti halor kane ka ishu. Ngin buddien ia kane ka kam bad pynthikna ba ki kam hapoh ka Iingkashari kin dep noh kham kloi” ula bynrap.
Halor ka kam jong ka Forensic Laboratory hapoh ka Jylla, u Symbud Myntri RAngbah ula pyntip b aka Sorkar Jylla dang shen kala pynkha ia ka Directorate of Forensic kaba hap hapoh ka jingkhmih jong ka Tnad kam Pohiing.
“Katto katne ki jingtyrwa la dep ban aiti ha kaban pynkhlain ia ka jingtreikam jong kane ka Tnad bad ka Sorkar kala dei ruh ban ai jingmynjur ia kine ki jingtyrwa. Ngi la dei ruh ban thied ia ki katto katne ki tiar ba donkam ki ban pynthikna ha kaban pynsted ia ki case ba dang sah bad ba ia ki test ruh yn ym donkam shuh ban phah shabar ka Jylla (ban sted ka jingtohkit)” ula ong.
Haba iadei bad ka jingduna briew hapoh ka Tnad Pulit, u Bah Prestone ula pyntip ba u Myntri Rangbah ka Jylla ula dep khot ia ka jingialang dang shen bad rai ban pyndep noh ia ki jingduna briew bala mad da ki Ophis ki SP, ki Police Station, Women Police Station, Police Outpost ha kylleng ki jaka jong ka Jylla.
“U DGP u dang pynkhreh ia ka thup jingdonkam briew bad hadien bala dep kane, ka Sorkar kan sa thaw bad mang ia ki kam. Nga la thikna ba khyndiat bnai nangne, ngin sa lah ban pyndap ia kine ki jingdonkam baroh naduh ki Ophis ki SP haduh ki Outpost” ula kular.
