Dawa ki Sengbhalang ban khot hajir ia ki Nongpyniaid bad phah siew bailutksan
Nongstoin, Nailur 18 : Ka Longkmie kaba duh noh iala I Khun na ka jingiakop khwai dohkha ha Pamphyrngai, Ksehkohlong, West Khasi Hills, kila iam paitdohnud bad sngewsih kthang ba kala duh noh ia u Khun Shynrang ba ka kwah eh tang namar ka tamasa jong kiwei.
Kane ka Longkmie ka dei ka kong Daphiralin Jyrwa kaba dei na ka shnong Mawthawñiaw bad kaba dang don mynta hapdeng ka jingsumar ha Holy Cross Hospital, Mairang.
Haba iakren bad ki nongthoh khubor, ka Kong Daphiralin kaba iathuh ba ha ka sngi saitjain, katba ka dang don ha lynti ban leit kha Khunlung sha Shillong, ka kali kala sahkut naduh Nongspung haduh lai kynta eiei bad hadien kane, kala sahkut biang sa ha Umlieh bad poi hospital haduh ka por 7 baje janmiet.
“Ki bahaiing baroh kila pyrshang katba lah ban pyllait ia ka kali ba kan iaid hynrei namar ka jingkhapngiah ka surok da ki hajar ki rawon bad ki riew paidbah, baroh ki kali kim shym la lah satia ban khih na ka jingdheng” kala ong.
“Nga sngewsih kthang namar nga la duh noh ia u Khun Shynrang/Khun Phrangsngi ka Iing tang namar ka kam tamasa jong kiwei” ong kane ka Longkmie.
“Nga kyrmen ba kaba kum kane ka jingjia kan ym jia shuh ïa kiwei pat ki longkmie ha ki sngi ki por ban wan. Nga sngew dei ban kyntu ruh lada long kaba lah, sngewbha ban da pynbeit ha ka lynti kaba dei, khnang ba kan ym ktah ïa kiwei pat haba pynlong kum kine ki lympung”, kala bynrap.
La sakhi lyngba ka video ba dei ki briew kiba tuid sha katei ka jaka, ki bym shym la ailad wat ïa ki kali ba kin iaid kynthup ia ka Ambulance ban poi sha Hospital.
Kane ka jingjia kala pynbitar lep ia ki paidbah ka thain West Khasi Hills bad ka jingbitar ka long ruh kumjuh ia ki bor pyniaid ka District, kaba la ailad ban pynlong ia kane ka kam khalai.
Ka seng Hynñiewtrep Youths’ Council North West Khasi Hills District, Federation of Khasi Jaiñtia and Garo People West Khasi Hills bad ka Ri Khasi Sepngi Federation, ki la dawa na ka District Administration ban khot hajir bad dawa jingshai na ki nongpynïaid ïa katei ka lympung bad ban pynshitom ruh katba shong ka aiñ.
U President ka seng HYC samla Shembor Langrin u la buh jingkylli ruh ïa ka District Administration ba hato balei ka shah lane ai jingbit ban pynlong jingïakop khwai harud ka surok bah kaba la wanrah ïa ka jingthut ïa ka leit ka wan ki paidbah.
U Bah Chandra Nongdkhar President FKJGP u la ong ba ka seng ka dawa ïa ki nongpynïaid ba ki dei ban siew bai lutksan sha katei ka longïing kaba la ngat apot ha katei ka jingjia.
Kumjuh ruh ka sngewkhia ïa ka jingai jingbit jong ka District Administration, ba shah pynlong ïakop khwai ha rud surok. Ka seng ka dawa ba ki bor synshar District ki dei ban shim ka jingkitkhlieh bad ban ym ai jingbit shuh kum kine ki lympung ban pynwit ïa ki paidbah.
Kumjuh ruh ka seng RKSF u la ong ba ka por ka la dei ba kiba kum kine ki jingïakop ha rud surok bah bad ki jaka ïaid lynti ki paidbah dei ban khang syndon. U la ong ruh ba u tip shai ba ki don bun ki longïing kiba ïa pait ïa pra tang na ka daw jong kane ka jingïakop khwai.
Kine ki seng ki la ther ruh ïa ka tnad pulit ka ba nalor kam shym la lah ban pynïaid beit ïa ka leit ka wan ki kali, hynrei leit ïa sboh bad don bynta ruh ha jingpynbeit ïa kop khwai ban pynbna ïa ka kyrteng jong ki nongjop.
