Shillong, Nailur 18 : Uwei u Contractor ula ujor da ka ejahar sha ki Pulit bad ai mukotduma hapoh ka Iingkashari Meghalaya High Court, pyrshah ia kawei ka Executive Engineer jong ka Tnad Public Health Engineering (PHE) haba kynnoh ba kala dawa pisa ba kot palat T. 1 lak ba kan pyllait noh ia ka Bill jong ka kam ba u pyntrei na ka skhim Jal Jeevan Mission (JJM).
La kynnoh ruh ba kane ka Executive Engineer kala dep shim ia ka song pisa ba T. 30,000 na une u contractor kumba la iakut hynrei katla katta, la kynnoh ba ka dang kyntait ban pyllait ia ka bill namar ka jingkwah ba un siew kham bun.
Ia kane ka Executive Engineer la pynpaw kyrteng ha ka mukotduma bad ka FIR kum ka Kedia G Momin, kaba dei ka Sub Divisional Officer ka PHE ha Bajengdoba, North Garo Hills katba u contractor pat u dei u Tarseng Ch Sangma ba na ka Shnong Rongkhon Songgital, Tura.
Kat kum ka ejahar bala mudui ha Bajengdoba Police Station bala pynbud da ka mukotduma ha Iingkashari Meghalaya High Court, une u Contractor ula pyntip ba ula ioh ia ka work order ban pyntrei ia ka Pre Sedimentation Tank jong ka Akemgre Water Supply Skhim hapoh ka District, kaba la mang ban pyntrei haduh T. 74,64,200/-.
Ia kane ka kam la aiti sha u da ka Executive Engineer (PHE) cum Member Secretary, DWSM Jal Jeevan Mission, North Garo Hills ha ka 10 tarik Lber 2022.
Kat kum ka jingong jong u, hadien ba ula pyndep ia kane ka project, ka JJM kala wan ban jurip ia ka kam, kaba la pynlong da ki liang mamla ba lai (third party) kat kum ki kyndon bala buh bad ia kane ka jingjurip la leh ha ka 5 tarik u Jymmang 2023 haba shem ruh ba ka kam ka dei kaba biang nadong shading bad la ai ruh ia ka syrnot.
“Hynrei haba nga leit iakynduh ia ka SDO Kedia G Momin ban phah pyllait noh ia ka bill namar ba la dep ban pyntrei ia ka kam, kala dawa pisa pynbna haduh T 1 lak halor ka nongrimb b aka hap ban pynlut na ka bynta ban pynkhreh ia ka bill ha ka kyrdan ka jong ka. Hynrei namar ka jingduna pisa, nga la kyrpad ia ka ban shim tang T. 30,000 ia kaba kala mynjur bad kular ba kan sa pyllait noh ia ka bill ba T. 74,64,200/- tang hapoh shisngi lane arsngi duh. Nga la siew ia kane ka pisa ba T. 30,000 lyngba ka Google Pay ha ka 10 tarik Nailar, 2023 hynrei kat haduh mynta, kala kyntait ban pyllait ia ka bill jong nga da kaba ai daw ba laiphew jait kynthup ia ka jingleit donkam shabar ka Jylla” ong u Contractor.
Une u Contractor ula buh jingkylli ba kumno bad balei ba ka Ophisar Sorkar ka dawa pisa ban leh ia ka kam kaba ka dei ban leh bad kynnoh ia kane ka Engineer ba kala pyndonkam bakla iala ka bor bad leh ia ki kam ki bym hok.
Ka Iingkashari Meghalaya High Court kala aipor 2 taiew ia ka Sorkar Jylla ba kan ai jubab.
Une u Contractor ula ujor ia kane ka mukotduma ha Iingkashari Meghalaya High Court myn ha ka 12 tarik Nailur lyngba u nongiasaid ain G Ch Marak bad PT Sangma.
