Shillong, Nailur 15 : U National President ka National People’s Party (NPP) bad Myntri Rangbah ka Jylla Conrad K Sangma ha ka sngi Thohdieng, ula ong ba ka jingjied ia ki kyrtong ban mih aireng ha ka elekshon Lok Sabha 2024 kan shong eh kat kum ka lad ba ki don ban ioh ia ka jingjop.
“Ngi la sdang ban pyniaid ia ki kam ki jam bad ka party kala shong bishar ia kiba bun ki kyrtong (jong ka Shillong Parliamentary seat)” ong u Conrad haba iakren bad ki nongthoh khubor.
U iathuh ba ka NPP kan ai ka kabu ba kumjuh ia baroh ki briew, kiba kwah ban aplai bad iakhun ia kane ka elekshon na ka ticket jong ka party.
“Kan dei da ka lynti ban jied paidbah ha kaba ngin ailad ia ki briew ba kin iashimbynta ban pyntip ia ka jingkwah jongki ban iakhun bad hadien ngin sa jied pat ia ki kyrtong kaba shong kat kum ka lad ba ki don ban jop bad kiwei kiwei” ula bynrap.
Une u Khliehduh ka NPP ula kyntait ban ong eiei haba kylli la ka NPP kan pynieng ia u MLA barim ka Mawsynram Bah Himalaya M Shangpliang, uba la phet dang shen na ka BJP, kum u kyrtong na ka Shillong Constituency.
“Hooid, ngi pdiang ia baroh bad ngi la ju ong ia baroh ba kino kino kiba wan iasoh ka dei ban long ym da ka jingbuh kyndon. Ngam shym la kren ia une u briew, hynrei nga kren kyllum lang ia baroh . Kyllum lang, baroh ki wan iasoh da ka jingthmu ban shakri ia ki paidbah bad ia ka Jylla bad ka jingtreikam lyngba ka party. Namar kata, nga ong ba kino kino kiba don ka party ki lah ban aplai ia ka ticket” ula ong.
Haba phai sha ka Tura Parliamentary seat, u Conrad ula ong ba ka don ka jinghap pyrkhat ia ka sitting MP ne MP ba mynta ka Agatha K Sangma.
“Hooid, ngi don ia ka sitting MP nangtei bad kumta, ki don beit ki jinghap pyrkhat ia ka MP ba mynta. Kumba nga ong, ngi don ia ka Committee kaba khmih ia ki kam ai ticket bad kumta, ki kam baroh kin sa long ruh kumjuh ha Tura” ula bynrap.
Halor ka hamsaia ba u hynmen bad MLA barim ka Dadenggre James K Sangma u kwah ban iakhun ia ka elekshon Lok Sabha, une u Khliehduh ka NPP ula ong “Kumba nga ong, baroh ki briew ki lah ban aplai ia ka ticket bad ngin sa shong ban bishar. Ka kam hi ka iaid kumjuh ia baroh”.
 bad Myntri Rangbah ka Jylla Conrad K Sangma ha ka sngi Thohdieng, ula ong ba ka jingjied ia ki kyrtong ban mih aireng ha ka elekshon Lok Sabha 2024 kan shong eh kat kum ka lad ba ki don ban ioh ia ka jingjop.){kind=link}