Shillong, Nailur 14: Ka Ankita Sharma kala ioh ban shim haduh 5 wicket ba ai kamai tang 14 run ban pynjop da 3 wicket ia ka Ri-Bhoi District Cricket Association pyrshah ia ka South Garo Hills DCA, ha ka jingiakhun semi phainal ba nyngkong jong ka Meghalaya Cricket Association U-19 Girls Inter District Cricket Tournament ba long ha madan Umbuda, Nongpoh hynne ka sngi Palei.
Ka Ri-Bhoi kala wan hakhlieh eh ha ka jingkamai point jong ka Zone 1 Group A katba ka South Garo Hils kala wan ba nyngkong ha ka Singh Group Z one 2.
Ha kane ka jingiakhun, ka SHG kala jop ia ka jingkynting pisa bad jied ban tied nyngkong hynrei da ka jinglah ialehkai bha ka Ankita, ka SGH kala lah ban kamai tang 77 runs bad hap lut ki wicket hapoh ka 18.4 over.
Ka Ankita kala ioh ban shim ia ka wicket ha ka ball ba nyngkong eh jongka over ba nyngkong hynrei ka jingiakhun kala wan ha ki nongtied ba hapdeng hapdeng ka Ronjoli Basumatary bad ka Marme M Sangma kiba ioh ban iakamai mar 14 runs katba ka Jaylynn R Marak kala ioh 13 run. Arngut napdeng kine, kila shah pynhap wicket ha ka Ankita katba kawei la ioh da ka Bimala Thakur.
Ka samla Angelica Maring ruh kala ioh ban shim 3 wicket ba ai kamai 24 runs bad ka Cancyful Mynsong kala ioh 1 wicket bad ai kamai 6 runs. Ka kynhun ialehkai ka Ri-Bhoi kala ai tang 26 run kum ki extra.
Haba wan beh ia ka thong, ka Ri-Bhoi kala lah ban pyndep tang haduh ka 29.2 over bad hap tang 3 wicket.
Ka Ri-Bhoi mynta kan ap iano ba kan hap ban iakhun ha ka phainal.
Ka jingiakhun jong ka semi phainal kaba ar kan long lashai ka sngi Thohdieng hapdeng ka Shillong Cricket Association kaba khliehduh ha ka Zone 1 group B bad ka Tura DCA kaba dei ka runners up jong ka Zone 2.
