Imphal, Nailur 14 : Uwei u Pulit Sub Inspector ka Tnad Manipur Police, ula shah siat iap ha ki kynhun kaikhlaw ki bym lah ban ithuh ki dei kiei, ha ka sngi Balang ha Shnong Chingphei kaba hap hapoh ka Churachandpur District.
Une u Pulit ba shah siat iap u kyrteg u Holkhomang Haokip. Une u Pulit uba don mynshuwa ha Bishnapur District Police Station, ula shah hiar thma ha Reserve Line jong ka Churachandpur District.
Kat kum ka jingiathuh ki Pulit, une u Sub Inspector ula shah siat ar kuli bad ia ka met jong u la lap napoh ka bunker kaba don ha kliar lum Chingphei, ha ka por 1 baje mynsngi.
Kane ka jinglap ia ka metiap kala jia ruh ha ka por ba don ka jingiather kuli hapdeng ki volunteer ki Meitei bad Kuki ha Phubala Canal.
