Shillong Nailur 12: Ka Pynthorumkhrah Presbyterian Secondary School hynne ka sngi Baar, kala pynhap pyrda noh ia ka jingrakhe iaka Quasquicentennial ne ka jingdap 125 snem jong ka skul ha ka jingai jingshakri ia ka imlang sahlang ban pynsaphriang ia ka jingnang jingstad.
U Symbud Myntri Rangbah ka jylla u Bah Prestone Tynsong haba kren kum u Kongsan ula iaroh iaka skul ba kala lah ban sei iaki riewpawkhmat ha ka jylla kiba la trei ha ki bynta bapher bapher.
Ula ong, watla ka skul kala kynjoh sha ka jingdap 125 snem ha kaban ai jingnang jingstad ia ki khynnah, hynrei ula kyntu iaki bor pyniaid jong ka skul ba kin bteng ban trei shitom shuh shuh ban pynthikna ba ka skul kan nang roi bad kan nang kiew shaphrang ha ka lynti iaid ka jong ka.
U Bah Prestone ula pynbna ruh ha ka jingialang ba ka sorkar jylla kan ai jingiarap T.20 Lak ia kane ka skul ba kan ioh ban tei ia ka Higher Secondary.
“Nga ngeit skhem ba kane ka skul naduh u snem ban wan kan ioh ban sdang noh iaka jingai jinghikai ha ka Higher Secondary” ong u Bah Prestone.
Katba u CEM ka KHADC u Bah Pyniaid Sing Syiem ula iaroh ia ki mishoneri kiba la noh synniang na ka bynta ban kyntiew ia ka pule puthi ha ka rilum Khasi-Jaintia bad dei lyngba ka synniang jongka Welsh Missionary ba u Rev Thomas Jones ula ai ia ki dak thoh Khasi.
U CEM ka KHADC ula pynbna ba ka Council kan ai T.25 Lak ia kane ka skul lyngba ka 15th Finance Commission naka bynta ban pyniar shuh shuh ia ki kamra skul.
Ha katei ka jingialang la iadonlang u MP ka Lok Sabha u Bah Vincent H. Pala, u Myntri ka sorkar jylla u Bah AL Hek uba long ruh u MLA ka thaiñ, u Chairman ka KHADC u Bah Lamphrang Blah, u Deputy CEM ka KHADC u Bah PN Syiem uba long ruh u MDC ka thaiñ, ki nongpyniaid jong ka skul, ki nongsharai jong ka Balang Presbyterian na Mawkhar bad Pynthorumkhrah bad kiwei kiwei.
Ha kane ka jingrakhe, u Bah Prestone ula pyllait iaka kot sah kynmaw jong ka skul bad la pynkup burom ruh ia ki nonghikai jong kane ka skul.
