Shillong, Nailur 11 : Ka North East Indigenous Peoples’ Forum (NEIPF), Shillong Chapter, kala dawa ia ka Sorkar Jylla ban pyntreikam noh ia ka Prevention of Illicit Traffic in Narcotic Drugs and Psychotropic Substances, (PIT- NDPS) Act 1988 ha ka jylla ban lah ratdyngkhong ia u droks hapoh ka Jylla.
Ka NEIPF kaba kynthup ia ka seng Federation of Khasi Jaintia & Garo People (FKJGP), Hynniewtrep National Youth Front (HNYF) bad ka Ri-Bhoi Youth Federation (RBYF), kala dawa ruh ban pynkha noh da ka Tnad ba pura jong ka Anti Narcitics Task Force (ANTF) kumba long ka SB, CID ha Jylla, ka ban khlieh da u Heh Ophisar ba bat ia ka kyrdan Indepctor General (IG) ka ban peit thik tang ia ki kam khaii droks.
Lah ban kdew hangne ba ha u bnai Jylliew, ka Sorkar kala pynbna ban thung ia ka Advisory Board kaban khlieh da u Judge bala shongthait ka Iingkashari High Court, ban lah pyntreikam ia ki kyndon ka PIT-NDPS Act hapoh ka Jylla.
Ia kane la pynbna da u Myntri ka Tnad Social Welfare ka Jylla Bah Paul Lyngdoh hadien ka jingiakynduh bad ki Heh Pulit, haba pyntip ruh ba kat kum ki kyndon ka PIT-NDPS Act, wat ki nongdih bad nongkhaii kin ym lait na ka jingshah pynshitom da kaba set phatok ym duna ia ka 3 bnai kaba lah ban pynjlan shaduh shisnem.
Haba iakren bad u Nongthoh khubor, u Nongaiktien ka NEIPF Bah Dundee C Khongsit, ula ong ba ka Jylla Meghalaya kala donkam palat ia ka Ain kaban leh tyngeh ia ki nongkhaii ne nongdih droks namar ka jingnang jyllei u drok bad kynrei ki nongdih droks ha manla ki shnong ka Jylla, uba la poi ruh wat sha ki jaka nongkyndong.
“Ngi la sakhi ia ka jingkiew ki kam sniew khamtam ki kam tuh kam thiem ha manla ki shnong ki thaw. Ki kam tuh kila jia manla ka sngi ha manla ki shnong haduh ba ki paidbah kila hap thiah siar ialade ha ka miet ka iong. Ka daw hi ka dei namar ba tuh ban ioh thied droks” ula ong haba bynrap “Ka por kan sa poi ba lada kim ioh tuh shuh da kaba suk, kin sa poi sha u pud ban rah da ki tiar bad rung jubor sha ki thliew Iing”.
Une u President ka FKJGP ula ong “Kaba sheptieng eh ka long ba suki suki, kane ka kam droks ka lah ban pynkha ia ki kynhun nongkhaii kiban sa pyndonkam da ki kor ki bor ka juk ban lah pyniaid iew ia u droks”.
Ha kajuh ka por, u Bah Dundee ula ong “Ka Jylla kala donkam ban don noh ia ka Tnad ba pura kumba long ka Tnad SB, CID ka ban iakhun thik tang ia u drok ha Jylla”.
Kat kum ka jingong jong u, “Ngi tip kila don ki Anti Narcotics Task Force (ANTF) ha manla ki District ka Jylla bad ia kine ki kynhun la khlieh da ki Superintendent of Police (SP), kiba iakhun ia u droks hala ki jong ki jong ki District”.
“Ka Jylla kala donkam da ka Tnad ba pura jong ka ANTF ka ban pyniaid na Headquarter ka Tnad Meghalaya Police, ka ban khlieh da u Heh Ophisar ba bat ia ka kyrdan Inspector General (IG) ban iakhun ia u droks” ula ong.
“Mynta ngin hap ban wad ia ki buit (strategy) jong ki nongkhaii droks ba wan pynpoi droks ha Jylla. Ngin hap ban jop ia kine ki buit treikam lem kumta, ka eh palat ban iakhun ia u droks lada ngim lah ban tehlakam ia ka thymmei jong u” ula bynrap.
