Shillong, Nailur 10 : Ka Meghalaya College Teacher’s Association (MCTA) kala rai ban pdiang ia ka jingkhot jong u Vice Chancellor ka North Eastern Hill University (NEHU) ban iakren halor ka jingpyntreikam ia ka National Education Policy (NEP) 2020.
Ha ka kyrwoh, u General Secretary ka MCTA AW Rani ula ong ba ka Association kala pdiang ia ka shithi khot sngewbha ha ka 8 tarik Nailur, ban iakren ia ki kam ba iadei bad ka NEP 2020.
“Ha kane ka shithi watla u Vice Chancellor ula kdew ia ki jingmyntoi ban ioh da ka jingpyntreikam ia ka NEP, hynrei kam shym la don ka jingkdew ia kiba bun ki jingtynjuh” ong u Bah Rani haba bynrap ‘Watla katta, ka MCTA, kaba la kut jingmut ban trei na ka bynta ban pynbha ia ka kam pule dangle, ka khmih lynti ia ka jingiakren ba tei bad ba seisoh bad kala shim rai lyngba ka jingialang ba kyrkieh ka EC, ban pdiang ia kane ka jingkhot”.
Ka jingiakren hapdeng ka MCTA bad u Vice Chancellor ka NEHU kan long ha ka sngi nyngkong.
Ula ong ba ka MCTA ka phaikhmat sha u Vice Chancellor ban kren bad pynbeit ia kiba bun ki jingsngewkhia ba shongnia jong ka Association kumba kala kren naduh ka 21 tarik Naitung.
Ka MCTA kala dawa ia u VC ka NEHU ban weng noh mardor ia ka jingpynbna (notification) ba 12 tarik Naitung, ban pynkut noh ia ka jingiapyneh markylliang halor ka jingpyntreikam ia ka NEP.
Ka MCTA kala niew ia kane ka jingpynbna bala pynmih da u Officer on Special Duty (OSD) ka NEHU’ College Development Council (CDC) Debasish Choudhury ba 12 tarik Naitung, sha baroh ki Principal jong ki College bala iasoh bad ka NEHU ba kin pyntreikam noh ia ka NEP kum ka kam ‘shukor ba pyllein pyllein”.
Ka MCTA kala buh jingkylo halor ka jingkynnoh rai kyrkieh ban pyntreikam ia ka NEP watla bun na ki college kim pat long kiba la khreh ban pyntreikam ia ka.
U Bah Rani dang shen ula pyntip ba ki Nonghikai jong ki 22 tylli ki College kiba don hapoh ka lama jong ka MCTA, kila sangeh shim klas (boycott) ia ki samla pule ka first semester hapoh ka NEP bad kim shym la shim kam ruh kum ka jingset jingkylli ia ki first semester course hapoh kane ka Policy.
