Shillong, Nailur 10 : U MLA ka Jowai Bah Wailadmiki Shylla ula plie paidbah ia ka jingkieng doidoi ba pyniasoh na shiliang sha shiliang jong ka wah Myntdu ha ka Shnong Ialong, West Jaintia Hills.
U Secretary ka Shnong bah Masan War haba pyniaid ia ka jingialang, ula pyntip ba kane ka jingkieng kan iarap shibun eh ia ki paid nongrep kiba ju jam ia ka wah na shiliang sha shiliang ban leit rep khamtam ha ka por lyiur. Ha kane ka sngi la iadonlang ruh u EM ka JHADC Bah Phasmon Dkhar kum u kongsan symbud.
Ia kane ka jingkieng la tei ha ka jinglut ba T. 65 lak bad ka dei kaba pyniasoh na shiliang ka wah sha shiliang pat ha ka dong Umdalong, kaba dei ka fish sanctuary. Ia kane ka jingtei la bei tyngka da ka Thadlaskein C&RD Boock bad ka Dorbar Shnong bad la sdang trei ia kane naduh ka 2 tarik Rymphang, 2016.
Ka jingslem ban pyndep ia kane ka jingtei ka dei namar ka jingwan lynshop jong ka khlam Covid-19.
U Bah Wailadmiki Shylla ula ai ka jingiaroh ia u Waheh Chnong bad ka Dorbar Shnong, kiba la noh synniang lem sha ka jingtei ia kane ka jingkieng.
Ula pyntip ruh ba u Myntri Rangbah ka Jylla bad u Symbud Myntri Rangbah kila mynjur ban bei pisa haduh T 20 klur ban shna pynbha bad pynheh ia ka surok ha ka Shnong bad pynbna ruh ba shen ka Ialong kan sa kylla long ka model village.
U Bah Phasmon Dkhar ula ai ka jingkhublei ia u Waheh Chnong halor ka jingiai buddien ia ka jingtei bad kyntu ruh ia ki nongshongshnong ba kin sumar bha iaka jingkieng, ka ban sa long shen kum jingtei ba khring ia ki nongshangkai.
Kiwei kiba la kren ha kane ka jingialang ki kynthup ia u Dr. Brightstar Langbang, BDO ka Thadlaskein Block; F. Basan Project Director ka DRDA, bad u T. Ram Phawa Waheh Chnong nalor kiwei kiwei.
