Guwahati, Nailur 08 : U Myntri Rangbah ka Jylla Assam Himanta Biswa Sarma ula pynpaw ba um don satia ia kano kano ka jingpyrshah ban phiah noh la ka jong ia ka Barak Valley na Assam lada ki paidbah ki kwah shisha hynrei “Nga pyrshah jur lada kane ka jingdawa ka mih na ki paid Bengali kiba bun paid ha kane ka jaka”.
“Ngam kwah ban phiah noh ia ka Barak Valley na ka Assam. Lada ki paidbah ki kwah hi balei ngin pyrshah?hynrei ki paidbah ki dei ban shim ia kane ka rai da ka jingmynjur lang ym da ki katto katne ki Leftist” ula ong ha ka jingleit iuhkjat ha Barak Valley myn ha ka sngi Palei.
Ka jingdawa phiah ia ka Barrak Valley ka dei kaba la mih naduh u snem 1960 bad kane ka thain ka kynthup ia ki District ka Cachar, Karimganj bad Haliakandi. La pynkhie im biang myntau snem hadien ka jingpynduna ia ki Assembly seat n aka 15 sha ka 13 ha ka jingphiah constituency thymmai ka ECI.
Haduh 11 ngut ki briew kila iap na ka jingther kuli ki Pulit ha ka jingiakhih ha Silchar ha u snem 1960 ha ka por ba ka Congress ba ialam ia ka Sorkar Jylla ka thmu ban pynbna ia ka ktien Assamese kum ka Official language ka Jylla.
Ha u snem 1971, ki paidbah kila thaw ia ka Committee ban pynjur ia ka jingdawa ban ithuh noh ia ka Barak Valley kum ka Union Territory ha ka kyrteng jong ka Purbachal.
Ha kawei ka liang, ki paidbah ka Barak Valley kim sngewtynnad satia ia ka jingphiah constituency ba nang pynduna ia ki Assembly seat na ka thain.
“Nga la ioh bun ki message na Whatsapp na ki briew bad ki kwah ia nga ba ngan wan iuhkjat. Ki paidbah hi kila kmen bad kane ka jingphiah constituency bad ka BJP kan jop haduh 10 na ki 13 sear ha ka elekshon ban wan sha ka Iingdorbar Thaw Ain ka Jylla” ong u Himanta.
Ula bynrap ba ki paidbah ka thain ki dei ban kyntait ia ka jingdawa phiah noh ia ka Barak Valley na Assam.
