Shillong, Nailur 08: Ka Committee on Estimates ka ïingdorbar thawaiñ ka jylla kala leit jurip iaka jingtei jong ka Industrial Training Institute (ITI) kaba don ha Sakwang, Mawkyrwat, South West Khasi Hills bad kala sngewhun ban iohi ia ka rukom shna ia kane ka jingtei.
Ia katei ka jingjurip la ialam da u Chairman jong ka Committee, u Bah Mayralborn Syiem uba long ruh u MLA ka Nongpoh, ula pynpaw ia ka jingkyrmen ba ia katei ka jaka pule yn lah ban pyntreikam noh shen bad kaba sah mynta ka long sa tang ban pyndep ia ki kam kiba iadei bad ka jingai iaka bording elektrik bad ka jingpynpoi iaka umbam umdih.
U Bah Syiem ula ai khublei iaka Dorbar Shnong Sakwang kaba la noh synniang ei ia ka jaka kaba 4 Akar sha ka Directorate of Employment & Craftsmen Training hapoh jong ka Tnad Labour ban tei iaka ITI ia kaba la khmih lynti ba kan ai jingmyntoi shibun ia ki samla jong ka District.
Ula pynpaw ba lyngba ka ITI kan ai jinghikai ha ki 5 tylli ki kyrdan kaba kynthup iaka Surface Ornamentation Technique bad Embroidery, Wireman, Office Assistant cum Computer Program, Multimedia-Animation-Special Effect bad Driver cum Mechanic.
U Dkhot jong ka Committee uba long ruh u MLA ka Mawkyrwat u Bah Renikton Lyngdoh Tongkhar, ula kdew ba ki samla jong ka district kila hap ban leit sha kiwei pat ki district na ka bynta ban pule puthi, hynrei da ka jingtei iaka ITI, ki samla pule jongka South West Khasi Hills kin ioh ia ka lad ban kyntiew ialade ha ka jingpyntbit ha ka vocational training.
Ula pynpaw ia ka jingkyrmen ba kane ka jaka pule kan lah ban treikam pura noh shen.
Ha katei ka jingjurip la iadonlang ki dkhot jong ka Committee kiba kynthup ia ki MLA u Bah Adelbert Nongrum, ka Miani D Shira, Bah Wailadmiki Shylla, u Arbingstone B Marak, Bah Damanbait Lamare, u Remington Momin bad ki heh ophisar jong ka Meghalaya Legislative Assembly.
Ka jingleit jurip iaka ITI kadei shi bynta jong ka Estimate Committee kaba pynlong ia ka jingleit jurip ka baar sngi kaba kynthup iaka West Jaintia Hills District, East Jaintia Hills District, East Khasi Hills District bad South West Khasi Hills.
Ha ka 6 tarik u Nailur, ka Committee kala leit jurip iaka jinglong jingman jong ka jingtei iaka Residential School ha Sabahmuswang bad ia ka surok Lumshnong – Sonapur kaba don ha West Jaintia Hills District.
Ka Committee kala leit sha East Jaintia Hills ban jurip iaka jingtei ia ka Byndihati Residential School, ha kaba la iadonlang ryngkat ka MLA ka thaiñ ka Kong Santa Mary Shylla.
Hynne ka sngi, ka Committee kala khmih bniah iaka jingiaid ka kam ha kaba iadei bad ka Science & Commerce College ha Mawphlang, East Khasi Hills District, ka Mawphlang – Balat Road, kaba sdang na Lad Mawreng shaduh Weiloi, ha ryngkat bad ka jingleit jurip iaka jingtei iaka ITI ha Sakwang, Mawkyrwat.
