Shillong, Nailur 05: Ka President jong ka India, ka Droupadi Murmu ka la sam ia ka khusnam jong ka ri sha ki nonghikai na kylleng ka ri ha ka jingialang ba la pynlong ha Vigyan Bhavan, New Delhi mynta ka sngi ha ka jingrakhe ia ka sngi kyrpang jong ki Nonghikai.
Na jylla Meghalaya u bah Timothy Jhones Dhar bad u Madhav Singh ki la iohpdiang ia ka khusnam National Teachers Award 2023 na ka President.
Ka jingthmu jong ka National Teachers’ Award kalong ban rakhe ia ka jingnohsynniang ba kyrpang jong ki nonghikai ha ka ri bad ban ka jingmut hadien ka khusnam National Teachers’ Award ka dei ban rakhe ia ka jingnoh synniang ba kyrpang jong ki nonghikai ha ka ri bad ban pynkup burom ia kito ki nonghikai, kiba la trei met bad mynsiem, ban kyntiew ia ka pule puthi bad ia ka jingim jong ki shah hikai jong ki. Man ka khusnam ka wan lang bad ka certificate, ka song tyngka kaba T. 50,000 bad ka takma rupa.
U bah Timothy Dhar udei uba hikai ia ka Mechanic Motor Vehicle ha Govt. Industrial Training Institute, Shillong bad ha ki 25 snem ba la leit u bah Dhar u la ai jinghikai ha ka Advanced Practical Training wat hapdeng ki jingduna kiba don.
U la pyndonkam ia ka jingsaindur thymmai jong u bad ki sap ha ka rukom ai jinghikai jong u. Namar ka mynsiem aiti jong u, ka la plie ki lad ioh kam ioh jam ia ki shah hikai jong u ha ki kompani bapher bapher ba iadei bad ki kam kali bad ki karkhana ba don ha ka jylla bad shabar ka jylla. Ka jingnohsynniang jong u kalong shisha kaba dei ban ai jingiaroh namar ki jingai jinghikai jong u ka la iarap ia ki samla pule ban poi sha ka jingjop. Katto katne na ki shah hikai jong u ki la ioh ia ki kyrdan ba hakhmat ha ki eksam All India Trade Test.
U la iohpdiang ruh ia ka khusnam Kaushalacharya ha u snem 2019-20. U long u briew uba iaishah bad uba shai ka jingmut jingpyrkhat bad um ju randien na ki jingeh. Ha u Bah Dhar ki shah hikai ki lap ia u nonghikai ba shisha.
U Madhav Singh, udei u nonghikai Science ha Alpha English Higher Secondary School, Ri Bhoi district bad u la pynpaw ka jingkmen jong u halor ka jingiohpdiang ia kane ka khusnam bad u udei u Resource Person ha ka National Children’s Science Congress bad u don bynta ban kyntiew ia ka science hapdeng ki khynnah.
U la ioh ia ka khusnam ‘State best teacher’ ha u snem 2021. U Singh u la ong ba kane ka jingjop ka long kaba kyrpang bad u la ai jingsngewnguh ia baroh. “Nga la dap da ka jingsngewkmen, ha ka sngi kaba nga la iohpdiang ia ka khubor ba ngan sa ioh ia ka khusnam.
Ha ka jingai jingkren jong ka ha kane ka sngi, ka President jong ka India, ka Droupadi Murmu ka la ong ba ka jingioh jinghikai ha ki por ba dang sdang ka pule puthi ka long kaba kongsan bha ha ka jingim jong ki briew.
Ka la ong ba bun ki nonghikai ki kren shaphang ka ‘Three-H formula’ na ka bynta ka jingkiew shaphrang kaba ryntih ha ki khynnah ha kaba u H ba nyngkong u dei u ‘Heart’, u H ba ar u dei u ‘Head’ bad u H ba lai dei ka ‘Hand’. Ka la ong ba u ‘Heart’ u iadei bad ka jingsngewlem, ki nongrim ba khlain, ka jingkhlain jong ka jinglong bad ka jingithuh ia kaba bha. Ka la ong ba ka ‘Head’ lane ka jabieng ka iadei bad ka jingkiew ka jingmut jingpyrkhat, ka jinglah pyrkhat sani bad ka jinglah pule bad ba ka ‘Hand’ ka iadei bad ka jingtbit ban leh ia ki kam bapher bapher kiba iadei bad ka bor met. Ka la ong ba ka jingkiew shaphrang ba pura jong ki khynnah kan urlong tang da kaba peit bniah ia ka rukom treikam kaba pura.
Ka President ka la ong ba namar ka jingiadon bynta ki longkmie ha ka kam ai jinghikai, ka jingdon ki longkmie kiba ioh ia kane ka khusnam ka dei ban kham bun. Ka jingai mynsiem ia ki khynnah kynthei bad ki nonghikai kynthei ka long kaba donkam bha na ka bynta ka jingpynkupbor ia ki, ka la ong.
Ka President ka la ong ba baroh ki kynmaw ia ki nonghikai jong ki. Ka la ong ba ka jingiaroh, ka jingai mynsiem ne ka jingpynshitom ba ki khynnah ki ioh na ki nonghikai ka sah ha ka jingkynmaw jong ki. Ka la ong ba haba ki khynnah ki shah pynshitom da ka jingthmu ban pynbha shuh shuh ia ki, ki sngewthuh hadien ia kane. Ka la ong ruh ba ka jingai ka jingieid ia ki ka kham kongsan ban ia ka jingai jingnang jingstad ia ki.
