Nongpoh, Nailur 05: Ka ophis District School Education Officer, Ri Bhoi District ha ryngkat ka Sub Divisional School Education Officer Nongpoh ka la rakhe ia ka Teacher Day kaba 62 ha ka jingialang bala pynlong ha Parish Hall Nongpoh.
Ha kane ka sngi, la sam ruh ia ka khusnam Best Teacher Award ha ka Secondary Level ba la ioh da u Padam Chettri napoh ka Nehru Memorial Hr. Sec School, ha ka Upper Primary School la ioh da ka Balongsha Rympei, na ka Mynken UP School, Bhoirymbong bad ka Lower Primary School pat la ioh da ka June Merry Sun na Umsning Govt. LP School. Kumjuh ruh la pynkup burom ia ki khynnah skul kiba la pass bha ha ka SSLC bad HSSLC eksam.
Ia kine ki khusnam la wan ban sam da u Bah Mayral Born Syiem, MLA ka Nongpoh Konstituensi kum u kongsan ha ka jingiadonlang ruh u Bah Eric Calvin Dkhar, BDO ka Umling C&RD Block, ka Kong Paidalyne L Nonglait, DSEO nalor kiwei kiwei ha ryngkat ki nonghikai bad khynnah skul na ki skul bapher bapher jong ka Ri Bhoi District.
Haba ai jingkren, u Bah Mayral u la ai jingiaroh ia ka tnad DSEO bad SDSEO, ki la shimkhia ban pynlong ia kane ka jingrakhe kaba shongkun ban ai burom ia ki nonghikai ka district kiba len lade ban phriang ia ka jingnang jingstad.
Ula ai khublei kyrpang ruh ia baroh ki nonghikai khamtam ia ki nonghikai kiba la shah pynkup burom ha kane ka sngi da ka jingkyrmen ba kin nang iai bteng ban shakri ha kaban pyn phyrnai ia ka lawei jong ki samla pule.
Ia kane ka jingrakhe la pynphuh pynphieng ia ka prokram da ki jingrwai, ki jingput jingtem bad ki jingshad tynrai ba la shimbynta da ki khynnah skul na ki skul ka thain Nongpoh.
