Shillong Nailur 04: U Symbud Myntri Rangbah ka jylla u Bah Prestone Tynsong hynne ka sngi Nyngkong ula plie ia ka jingrakhe dap 100 snem jong ka Khasi National Dorbar ha ka jingialang kaba la long ha Khasi National Dorbar Hall Mawkhar.
Haba kren ha ka jingialang kum u Kongsan u Bah Prestone ula ong “Ha u snem 1946 na kane ka Dorbar la phiah arliang iaka jaidbynriew hynrei lyngba ka jingpyniaid jong u Blei Trai Kynrad bad ka jingiaid lynti haduh kane ka khyllipmat kaba mynta bad dei lyngba ki jabieng kaba nep jong ki riewrangbah ki jong ngi bad ka jingiohi jngai, kaba khatduh ngi ioh iaka jinglaitluid bad ngi ioh ruh ban synshar dalade ialade”.
U Bah Prestone ula ong, ba ha u snem 1953 ba la ioh iaka District Council ne ka Sixth Schedule, kane kadei ka stieh kaba khraw ia ka jaidbynriew bad iaka jylla bad hapoh jongka ,ki bun kiei kiei kiba dang lah ban pynbha, pynjanai bad ban iaid shakhmat ha baroh ki liang jongka imlang sahlang.
“Nga pynpaw iaka jingsngewnguh ia ki nongialam kiba radbah jong ka jylla jong ngi, haduh ba ngin da ioh iaka jylla jong ngi bad ka jingproh jabieng ka jongki nalor ka Sixth Schedule ngi don iala ki jong ki aiñ ki kanun hapoh ka jylla ka jong ngi. Don kiba ong ba ka jaidbynriew kam shngain shuh ha kane ka jylla ka jong ngi, nga nga ong, map lem lada phi iapher jingmut, kam dei kumta, namar ngi shngain tang ba ngi dei ban pynkhlain shuh shuh iaka jingshngain” ong u Symbud Myntri Rangbah.
Ula ong ba dang ha kine ki sngi ka District Council ka iaid kylleng jongka Iewduh katkum ka riti synshar jong ka ri India, hynrei kaba la pynshoh jingmut ka long ba ki longkmie longkpa, ki khun kynthei ne shynrang kidei ban kyndit bynriew ban iaid katkum ba la pynkup bor da ka riti synshar jong ka ri India bad da ki aiñ ki kanun kiba ka sorkar Meghalaya kala pynmih lyngba ka iingdorbar thawain ka jylla bad kan dang iai pynmih na ka por sha ka por khnang ba kan nang shngain, nagkiew nangbit nangbiang bad kan nang mih na kawei ka pateng sha kawei pat.
U Bah Prestone ula pynbna ba yn ai jingiarap T.1 Lak sha ka Khasi National Dorbar Hall khnang ba kan lah ban pyniaid shakhmat ia ki kam ki jong ka.
La seng ia ka Khasi National Dorbar Hall ha u snem 1923 bad ha ka jingiaid lynti kane ka Dorbar u Khasi-Jaintia mynta kala kynjoh sha ka 100 snem.
Ha kane ka sngi u Bah Prestone ula pynher ia ka lama jong ka Dorbar bad plie ia u Mawnongrim ban kynmaw burom ia ki nongseng ia ka Khasi National Dorbar. Ula plier uh ia ka jingpyninam ia ki dur ki dar jong ki barim bajah kiba kynthup ia ki nongialam jongka jaidbynriew kiba iakhih ban pynioh iala ka jong ka jylla kaba pura.
Ha kane ka jingrakhe, u Bah Prestone ula pyllait paidbah ia ka kot sah kynmaw jong kane ka lyngkhuh dap 100 snem bad ula pynkup burom ruh ia u riewrangbah J Kerrsing Tariang uba la don 90 snem ka rta, uba dei u General Secretary ka Khasi National Dorbar ha kaba la iadonlang u President ka Khasi National Dorbar u Bah Laborius Manik Syiem, u Syiem ka Hima Mylliem, u Syiem ka Hima Khyrim, u Syiem ka Hima Nongkhlaw bad kiwei kiwei kiba la shah khot sngewbha.
