Shillong, Nailur 04: Ka Hynniewtrep National Youth Movement (HNYM) hynne ka sngi kala kynduh ia u Myntri Rangbah ka jylla Conrad K Sangma ban pynkynmaw halor ka jingdawa ban pyntreikam noh iaka Employment Policy hapoh ka jylla.
Haba kren sha ki lad pathai khubor, u President ka HNYM bah Loius Dohtdong ula ong ba kane ka jingdawa ban don daka Employment Policy ka long kaba donkam palat namar ka jylla ka don hapdeng ka jingkyrduh ki kam ki jam iaki samla trai jylla.
“Ka jingkyrduh kam kyrduh jam ka long kaba jur bha hapoh Meghalaya. Ngi la sakhi ruh baka sorkar kam lah shuh ban pynmih kam bad dei namar kane ngi la dawa ban thaw daka Employment Policy ban pynbor iaki Company shimet ban mang kyrpang lypa haduh 80% ka kam iaki trai jylla” ong u bah Loius.
U bah Loius ula ong ba ka jylla ka don shibun ki samla kiba la nang la stad bad kiba la pyndep iaki jingpule ha ki kyrdan bapher bapher bad ka jingbym iohkam iohjam kala pynduh mynsiem iaki hynrei ka jingdon ka Employment Policy kan ai mynsiem iaki samla ban bteng iaki jingpule ban ioh kam hadien habud.
Ula iathuh baka sorkar jylla Haryana dang shen kala pyntreikam iaka bhah kaba 75% iaki trai jylla ban iohkam ha ki kompani shimet bad ia kane la sakhi ruh ha kiwei ki jylla kum ka Andhra Pradesh, Karnataka, Madhya Pradesh bad ka Maharashtra kiba la mang lypa haduh 80% ka kam iaki trai jylla.
Haba kylli, kaei ka jingkular na u Myntri Rangbah ka jylla, u President ka HNYM ula iathuh ba u Conrad ula pyntip ba ka jylla kala pyntreikam iaka jingbhah kyrpang haduh 80% iaki samla trai jylla ha ki Company shimet bad ia kane la sakhi ha ki Company pynmih dewbilat bad kiwei kiwei de.
“U Myntri Rangbah ula iathuh ba lyngba ka Single Window Agency, ka sorkar kala bthah iaki Company shimet ban mang lypa 80% iaki samla trai jylla hala ki company bad kane ka hukum haduh mynta ka dang treikam” ula ong.
Halor kane u President ka HNYM ula ong baka seng kan buddien ia kane ka kam bad haki por ban wan kan sa leit ban jurip iaki Company ban wad iaka jingshisha.
