Shillong, Nailur 01 : U MP ka Rajya Sabha bad President ka NPP-Meghalaya Dr WR Kharlukhi ha ka sngi Thohdieng, ula buh jingkylli ia ka National Green Tribunal (NGT) ba ka khang tih dewiong ha Meghalaya hynrei sngap jar jar ia ka jingjaboh ka lyer bad haw haw ha Delhi.
“Ngi don ka jingjaboh ha Delhi. Ka NGT ka don ha Delhi. Nga la rah ia ka jingkylli. Kam dei tang ba mih ki khniang jingpang hynrei ka dei ka kam iap. Ngam kren shaphang ki dohkha ne mrad, nga kren ia ki khun bynriew, balei kam shym leh eiei. Kala dei ban leh eiei hangtei ruh bad ka NGT ka don ha Delhi” ong u Dr Kharlukhi haba iakren bad ki nongthoh khubor.
U Dr Kharlukhi ula ong “Ngam ju ongba ka (NGT bad Supreme Court) ki bakla (haba khang tih dewiong ha Meghalaya) hynrei kaei kaba nga ong ba hooid phi la leh hangne, phi leh ban leh ruh hangtei”.
Haba pynpaw ka pynmong bha ia u ban iohi ba ki paidbah ki im sohsat namar ka jingkhang tih dewiong, une u Nongialam ka NPP ula ong “Kane kam dei ka nongrim jong ka Sorkar hynrei ka nongrim ba nga ieng—u dewiong ia ngi ki briew ban a Jaintia Hills u dei u lad kamai jakpoh. Ka dei ka hok tynrai bad ka jingkhang tih dewiong ia ki briew jong nga na ka district jong nga, kaba ngi la leh mynta la jan 40 snem ka dei ka jingkhang ia ka bam ka dih ia ki briew jong ngi”.
“Nga kyrshan beit ia ka jingtih dewiong. Phi lah ban sdang kumno kumno ruh ban tih dewiong hynrei ki briew jong nga kim dei ban iap jingit” ula ong.
U Dr Kharlukhi ula pyntip ba ula pyrshang ban kren ia kane ka kam hapoh ka Parliament hynrei u khlem iohlad satia watla ia kane ka ishu la wanrah la arsien ban iatai.
“Nga pyrshang ban pyni ba lada phi la leh hangne (khang tih dewiong ha Meghalaya) balei bay m leh ha Delhi ruh. Kane kam mut ba ngi don sha jngai, phi lah ban leh kat kaba phi mon bad ngi” ula bynrap.
Halor ka jingbthah ban sdang ia ka jingtih dewiong da ka jingstad saian, une u MP ka Rajya Sabha ula ong ba ia u dewiong hi dei ban tih bad ka jingtih kam dei ban sangeh.
“La 40 snem ngi la tih ia u dewiong hynrei phi wan shisngi bad khang noh ia ngi. Ka Sorkar Pdeng ka dei ban tyrwa eiei ia ngi ba katne ki briew jong phi kila duhnong, shim ia kane ka pisa hynrei ia kane ruh ym shym la tyrwa sha ngi. Phi shu khang tang namar ba ngi don sha jngai ha kane ka thain Shatei Lam Mihngi. Kane kam dei ban long kumne” ula ong.
Haba kylli halor ka jingtih dewiong thliew khnai bala khein beain, u Dr Kharlukhi ula ong “La 40 snem kila leh ia kane. Ha ka por ba ki briew jon gngi ki dang don, ym don ba iohi ia kata. Lada phi peit ia ki briew bym nang bym stad hangne, ki khot ia ki ki coal baron lane coal mafia, kim tip hi re wat ia ka jingmut jong ka coal baron ne coal mafia”.
Une u MP ula kam ruh ba ki briew kila sdang ban iap namar ka jingtih dewiong hadien ka jingkhang ka NGT. Ula kdew ia ka jingjia ha ka thain Sutnga ha kaba katto katne ngut ki samla kila buh iala ka jingim ha ka jingma da kaba leit tih dewiong thliew khnai namar ka jingbym don pisa ban bsa ia ki briew kiba wan sha ka jingialang Presbytery ha ka thain.
Kat kum ka jingong jong u, ka jingtih dewiong kam shym la pynmyntoi ia ki briew ba riewspah hynrei kala iarap ban kyntiew ia ka ioh ka kot jong ka Jylla ha kaba bun ki briew kila ioh jingmyntoi.
Pule lang ia kane: Buhthong ka NPP ban jop 15-20 seat ha ka Elekshon Lok Sabha na NE
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
