Shillong, Nailur 01 : U MP ka Rajya Sabha ka NPP bad President ka Jylla Dr WR Kharlukhi ha ka sngi Thohdieng ula iathuh ba ka party jong u ka buhthong ban jop 15-20 seat na ki jylla ka thain Shatei Lam Mihngi ha ka elekshon Lok Sabha ban wan.
“Hooid, ngin pyrshang ban sei kyrtong na baroh ki Jylla ka thain. Lada ka NPP ka lah ban jop ha baroh kawei ka thain, kaba ngi la antad bad buhthong 15-20 ngut, ka sur jong ngi ruh kan sawa jam ha Parliament. Lada kam long, kan long thik kum ka kam u Vice Chancellor, ka kam u Director ka NEIGRIHMS ha kaba yn ym don mano manor uh ban sangap ia ngi” ong u Dr Kharlukhi.
Haba pynpaw ba ka NPP ka ieng kum ka seng sain pyrthei na ka bynta ka thain Shatei Lam Mihngi, ula ong “Ban pynurlong ia kane, ngi hap ban ioh ia kata lem kumta yn ym don ba sngap ia ngi ha Delhi. Tang uwei ne arngut ki MP ba iaid la la ka jong, yn ym don ba sngap satia ia ngi. Phi iohi ia kaei kaba jia ha Manipur, ym don mano ano ruh ba iakren halor ka Manipur namar ngi iaid la ka jong. Lada ngi don kawei ka sur na ka thain, ban phah 20-21 ngut ki MP, kan jin da pher bha. Lada ka NE hi ka iapait iapra, ngi hap ban shu klet noh ia kiei kiei baroh”.
Haba kren halor ka kam jong u Vice Chancellor ka NEHU, u Dr Kharlukhi ula ong “Ngi la iakynduh bad la thoh ruh wat sha u Myntri ba dei khmih hynrei tang ia ine I kam ba rit, ym don ba pynsngap ia ngi. Ta ka daw nga ong ba lada ka NE ka kwah ban long ka bor ba khlain ha ka kam sain pyrthei ha Delhi, ngin hap ban phah ia ka kynhun ba don bor, ka party n aka thain kaba don kumba 15-16 ngut ki MP bad hangta kin sa sngap ia ngi”.
Ula ong ba ka Sorkar Meghalaya kala mynjur ia ka resolution ban pynrung ia ka ktien Khasi ha ka khyrnit ba phra bad ban pyntreikam ia ka Inner Line Permit (ILP) hynrei ka Sorkar Pdeng kam shym la leh eiei. “Ta ka daw lada ngi dang iapait iapra hi, ngi hap ban klet ia kiei kiei baroh” ula ong.
