Shillong Nailar 31: U Chief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem, hynne ka sngi Palei, ula maham iaka R&R Colony Society ba kam lah ban ai NOC ne Residential Certificate sha ki nongshongshnong ka Colony lait noh tang ka Dorbar Shnong Rynjah.
Katei ka jingkren u Bah Pyniaid Syiem kala mihhadien ka jingleit iakynduh jong ki nongialam jong ka Dorbar Shnong Rynjah, ka Seng Kynthei bad ka Seng Samla Shnong Rynjah, kiba la pynpaw iaka jingbynniaw kaba jur halor ka jingai NOC ka R&R Colony Society ia ki bar jylla ba kin ioh iaka Trading License ha katei ka shnong.
“Haduh mynta ngim pat ioh ia kino kino ki kot ki sla ban pynshisha ba la ai da kita ki President ne Secretary jongki Society ne ban ishu ia ki NOC ne kino kino ki kot. Kaba ngi iohi kadei tang lyngba ki lad pathai khubor bad kata ruh kadei naduh u snem 2007-2008, hynrei nga kwah ban kren shai ba naduh u snem 2019 ka Society kam lah shuh ban ai iaka NOC ne Certificate sha ki nongshong shnong bad ka KHADC bad ka Hima Mylliem kala ai bor ba dei tang ka Dorbar Shnong Rynjah kaba lah ban leh ia kata, lada don pat mano mano ba pynkheiñ hadien jong kane ka hukum na ka Hima Mylliem bad na ka District Council, ngin pynshitom katkum ka aiñ” la ong u CEM.
U CEM ula ong “Ngim pyrshah eiei iaka Society ba kan treikam ne ban leh ia kino kino ki kam kiba iadei bad ka lehniam lehrukom hynrei ha kaba iadei bad ka riti dustur pyniaid shnong, ngin ym shah da leilei ruh. Ia ka synshar shnong kam hap ha ki Society, ngi don ia la ki jong ki aiñ bad ki kyndon aiñ bad baroh ki shnong kiba hap hapoh jong ka Hima Mylliem kin hap ban bud katkum ka riti synshar jongka Hima”.
U CEM ula ong ba ia ka R&R Colony la tip kum ka ‘Them Rynjah’ bad ka dei kaba hap hapoh jong ka Dorbar Shnong Rynjah naduh u snem 2019 bad kumta dei tang ka Dorbar Shnong kaba la shah pynkupbor haka KHADC bad ka Hima Mylliem ban ai ia kino kino ki kot ki sla sha ki nongshong shnong.
Ula ong “Ngim don jingithuh ia ki briew kiba sah ha ka dong Them Rynjah ba kin kam ialade ba ki dei ki Headman hynrei ngi ithuh beit tang iaka Dorbar Shnong Rynjah, u Rangbah Shnong ka Rynjah bad ia ki Rangbah Dong kiba la pynkup bor daka Dorbar Shnong Rynjah”.
U Rangbah Shnong ka Rynjah Bah Eddie War ula iathuh ba naduh u snem 2019 la pynmih iaka jingpynbna paidbah ba ka Them Rynjah kala hap hapoh ka jingpeit bad jingkhmih jong ka Dorbar Shnong Rynjah bad ym don ba lah ban ong ba katei ka jaka kam hap hapoh ka shnong Rynjah.
“Ngim khang iaka Society ba kan treikam hapoh ka shnong Rynjah namar kadei kaba la dep ban rejistar bad kadei kaba la rim bha, hynrei ha kaba iadei bad u pud u sam ne ki kam khaii pateng, kine baroh ki hap hapoh ka jingkhmih jong ka Dorbar Shnong Rynjah” ong u Bah War.
Pule lang ia kane: Kyntu ka BJP ia ka Sorkar ban tuklar noh ia ka jingiatynjuh bor ka MCTA bad NEHU halor ka NEP
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
