Shillong, Nailar 30 : Ka Trinamool Congress (TMC) kala phaikhmat sha u MLA barim ka Umroi Bah George B Lyngdoh ban long kum u kyrtong ka party ban iakhun ha ka elekshon MP-Lok Sabha na Shillong Parliamentary seat ka ban long lashem snem.
Ia kane la pynpaw da u President ka Meghalaya Trinamool Congress Bah Charles Pyngrope haba iakren bad ki lad pathai khubor hynne ka sngi Balang ha Shillong.
“Ha nga shimet hi, nga sngew u Bah George B Lyngdoh u dei u kyrtong uba biang eh hynrei ka party kan sa shong bishar bniah halor ki kam ba iadei bad ka elekshon MP-Lok Sabha 2024” ong u Bah Charles.
Une u MLA ka TMC na Nongthymmai ula pyntip ba haduh mynta, ka Party kam pat shim satia ia kano kano ka rai halor ka kam elekshon MP-Lok Sabha hynrei kum ka party kan sei kyrtong na baroh artylli ki parliamentary seat-ka Shillong bad Tura parliamentary seat.
“Nga la dep ban iakren bad u General Secretary ka TMC ba khmih ia ka Meghalaya Manas Bhunia bad nga la pan por ban iakynduh ban iakren kham bha la kan long ha Shillong ne ngan leit nga sha Kolkata” ula pyntip.
Haba kylli, ula ong ba ia ka Shillong parliamentary seat hi, u kwah ban pyniakhun ia u Bah George B Lyngdoh hynrei ia ka Tura parliamentary seat, u ieh ha ka jingstad u nongialam ka TMC parliamentary party Dr Mukul Sangma ban leh ia kaba donkam.
Pule lang ia kane: Haduh 22 tylli ki College kim pat bud ia ka NEP 2020, dang bteng ka boycott ka MCTA
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
