Shillong Nailar 14: U Nongrwai ba pawnam u Ronan Keating ula pynkhreh ban wan pynshongshit ia ki paidbah ha ka tamasa Shillong Cherry Blossom Festival, kaba 3 sngi kaban long ha ka 17, 18 bad 19 tarik u Naiwieng mynta u snem.
Nalor u Ronan Keating, ha katei ka festival yn wan ruh ban iashimbynta da ki kynhun nongtem na kylleng ki ri kiba kynthup iaka Pink Panda, Jonas Blue, Hybrid Theory bad Kenny Musk.
Nalor kane kin don ruh ki kynhun kiba pawnam kiba napoh ka jylla Meghalaya hi kiban iashimbynta ha katei ka tamasa, kiba kynthup ia u Bah Lou Majaw, Snow White, Meba Ofilia, Da Minot, Summersalt, Emperical Tribe, Street Stories, Banjop, Lokpante, Prinstone Sutnga, Claudia, Young Natee, Wanjop Sohkhlet bad kiwei kiwei kiban pynshongshit ia ki paidbah kiba leit sha katei ka tamasa.
Haba iakren bad ki nongthoh khubor u Myntri ka tnad jngohkai u Bah Paul Lyngdoh ula ong ba iaka Shillong Cherry Blossom Festival mynta ka kynti yn pynlong ha Ri-Bhoi District bad iaka jaka ban pynlong ia katei ka tamasa yn sa pynbna paidbah kham hadien.
