Tura, Nailar 14: Ka Tura Runner’s Club hynne ka sngi Nyngkong kala pynlong da ka jingpynkhuid ia ka Chandmari Football Playground kum shi bynta ban rakhe ia ka jingdap 9 snem kane ka Club.
Ha katei ka jingpynkhuid la wan ban iashimbynta da palat 20 ngut tam ha kaba kila lum la lang ia ki jaboh jabain bad kila sar khuid ia katei ka Madan ialehkai.
Haba iakren bad Ka Shlem, u Secretary ka Tura Runner’s Club Dr. Silnang Marak ula ong, “Ka jingpynkhuid mynta ka sngi kadei shi bynta jong ka jingrakhe ia ka jingdap 9 snem jong ka club bad shi bynta jong kane, ngi la pynlong ruh ia ka prokram thungdieng bad ban leit sha ki shnong ki thaw ban pynsngewthuh ia ki paidbah shaphang ka jingkongsan ban pynneh pynsah bad ban iada ia ka mariang”.
U Dr. Silnang ula pyntip ba kin sa pynlong ia ka Marathon ha ka 5 Tarik u Naiwieng ia kaba yn tip kum ka Turathon badnha kane ka jingiakob kin don 4 tylli ki kyrdan, ka Full Marathon, ka Half Marathon, ka jingmareh kaba 10 km bad kaba 5 km.
Ka Online Registration na ka bynta ka Turathon kan sdang naduh ka 1 tarik u Nailur bad kan don ruh ka jingshim ia ka offline registration.
Ula ong ba ka jingai ia ka khusnam sha ki nongjop kan long kaba heh bha.
Ia ka Tura Runner’s Club la seng ha ka 14 tarik u Nailar 2015 ha ka sngi ba pynlong ia ka Independence Day Run da ka District Sports Office, haba katto katne ngut ki nongmareh kila wan lang ha kawei ka kynhun ban thaw ia ka Club bad ia kane ka kynhun mynta la ialam da Dr. Ramona Sangma.
