Shillong, Naitung 13: U Director General of Police (DGP) ka Tnad Meghalaya Police u Dr LR Bishnoi ula ong ba ka Tnad Pulit kan leh da kaba tyngeh ia kino kino ki kam kiba iadei bad ka jingpynkhein ia ka hok longbriew man briew.
“Ngi la dep bthah na Headquarter sha baroh ki Thanad, Sub Division bad ki District ba ki dei ban burom ia ka hok longbriew manbriew ha baroh ki bynta…Lada kano kano ka jingpynkhein ka wan sha ka jingtip jong ngi, ngin leh da kaba tyngeh khlem da pynslem ia ka por” ong u Bishnoi haba iakren bad ki lad pathai khubor.
Hynrei une u heh Pulit ula pyntip bad ka Tnad Pulit haduh mynta kam pat ioh pdiang satia ia kino kino ki jingujor ba iadei bad ka jingpynkhein ia ka hok longbriew manbriew.
Ha kajuh ka por, u Myntri Rangbah ka Jylla Conrad Kongkal Sangma ula pyntip ba ka kaiphod jingtohkit Judicial Inquiry bala aiti da u Justice Vaiphei ba iadei bad ka jingshah siat iap u Bah Cherish Thangkhiew, ka dang don hapdeng ka jingbishar.
“Namar ka dei ka kaiphod kaba jrong bha haba ianujor bad kiwei kiwei ki kaiphod, kumta kala shimpor ia ka Sorkar ban pyndep ia ka jingbishar” ula ong.
“Ynda ngi la dep, ngin sa pyntip sha baroh ki paidbah halor ka jingshem jong kane ka kaiphod jingtohkit bala dep aiti sha ka Sorkar” bynrap u Myntri Rangbah ka Jylla.
Haba kylli halor ki kam kaikhlaw ha Jylla, u Myntri Rangbah ula pyntip ba ha ka jingialang bad ki Superintendent of Police (SP) bad ki Commandant jong ka Tnad Pulit, kaba la pyniaid da u Myntri Rangbah hi dalade, la iakren halor ki kam kaikhlaw nalor ki kam kiba iadei bad ka shongsuk shongsain ha ka Jylla.
U Myntri Rangbah u pyntip ba ia mynta hi, kam shym la don satia kano kano ka jingioh khubor haba iadei bad ki kam kaikhlaw ha Jylla bad ki jinglong jngman ha jan baroh ki District kilong kiba jai jai bad ba shongsuk shongshngain.
