Shillong, Naitung 12: Iwei I Khynnah ba dang 13 snem ka rta i la iap hashen bad 2 ngut pat kila mynsaw jur na ka jingshah lympat bording elektrik ha kawei ka jaka khlaw ba marjan ka MIDC Umiam, Block-6.
Kane ka jingjia kala jia hynne ka step por 11.45 baje eiei bad la ong ba kine ki Khynnah kila shah lympat ha uwei u sainar bording ba 11KV ba dkut .
Kat kum ka khubor Pulit la iathuh ba ine I Khynnah iba iap I kyrteng I Mikkinchi Momin katba ki arngut kiba mynsaw pat ki kynthup ia I Nikgrichi I Sangma ba 13 snem bad I Chuchang I Sangma ba dang 8 snem. Ia kine kiba mynsaw la pynkit noh mar mar sha Civil Hospital Shillong ban ioh jingsumar.
La pyntip ba kine ki lai ngut ki khynnah kiba shong ha kawei ka Iing ki Nongbylla jong ka Vikas Sawmill, kila leit iaid kai sha kane ka jaka khlaw ban kheit soh shiah hynrei kila tyngkhuh ia u waiar bording ba 11 KV uba dkut bad uba la don ha kane ka jaka mynta la katto katne bnai.
Halor kane, ka Khasi Students Union (KSU) Umiam Unit lyngba u General Secretary samla Markus Nongkhlaw, kala pynrem jur ia ka tnad MeECL halor ka jingle torti kaba lam sha kane ka jingjia ba sngewsih. Ka KSU kala dawa ruh ia ka Tnad ba dei khmih ba ka dei ban ai jingpynsajia bad dawa ruh ba kan ai jingiarap mardor ia ka longiing jong kine ki Khynnah.
