Namar ka jait Modi : Iaroh u Bah Ronnie ba pynsangeh ka Supreme Court ia ka jingpynsajia ia u Rahul Gandhi

Shillong, Nailar 05: U Nongialam ka Congress Legislative Party (CLP) Bah Ronnie V Lyngdoh ha ka sngi Saitjain ula iaroh ia ka hukum jong ka Iingkashari Supreme Court kaba la pynsangeh ia ka jingpynsajia ia u Nongialam ka Congress Rahul Gandhi halor ka mukotduma na ka jait Modi.

Ula niew ia kane ka hukum jong ka Iingkashari Supreme Court kum ka jingjop jong ka Ri India.

“Nga la kmen bha bad kum u Nongialam ka CLP jong ka Congress ha Meghaya, nga pynpaw ia ka jingsngewnguh ia ka iing kashari ba khlieh duh ka Ri namar kane ka pyni ba ngi lah ban leit wad ia ka jingbishar kaba hok na Iingkashari” ong u Bah Ronnie, uba dei u Nongialam ka Liang Pyrshah haba iakren bad ki nongthoh khubor.

Haba pynpaw ka jingshisha kala ieng rasong, ula ong “Ngi la ioh ia ka jingbishar ba hok, ka riti synshar paidbah kala jop bad ka riti synshar ka Ri kala ieng rasong”.

Haba pynpaw ba kane ka kam kam dei satia tang ia uwei u briew hynrei ia ki nongshongshnong jong ka Ri baroh kawei, une u Nongialam ka CLP ula ong “Na ka bynta ki nongshongshnong ka Ri India, kane kala wan kum kaei kaei kaba pyn kmen naba ka dang don ka iingkashari ban iada ia ka hok jong baroh ki nongshongshnong ka Ri”.

Ula ong ba kane ka hukum jong ka Iingkashari Supreme Court kala wan ruh ha ka por ba ka Ri ka dang sakhi ba bun ki Institution ne ki jaka treikam kila shah khein dewthala ha ka bor treikam.

“Ngi dang iai kyrmen ha ka Iingkashari naba ka Supreme Court kala pynsangeh ia ka jingmait kyrteng ia ka jinglong MP u Rahul Gandhi. Kam dei ka jingjop tang jong uwei u briew, hynrei ka jingjop jong baroh kawei ka Ri. Ka dei ka jingjop jong ka Ri India bad mynta ngi ngeit ha ka jingong ba ka India ka dei ka riti synshar paidbah bah eh duh ha ka pyrthei. Mynta kane ka kyntien kada don jingmut shisha” ula ong.

Pule ruh: Lum u Myntri ia ki Kynhun halor ka jingjur ka jingpep skul shiteng por ha Ri-lum Garo