Shillong, Nailar 04 : Ki Pulit ka Special Investigation Team (SIT) ka Ri-Bhoi District, kila ioh ban kem haduh 7 ngut ki riew runar kiba donkti ban leit lute ia ki artylli ki karkhana tylliat maw kiba don ha ka shnong Umduba bad Killing.
Kine ki riew runar kila lute ia kine ki karkhana ha ka 22 tarik Jymmang bad 11 tarik Naitung bad kila ioh ban khung ia ka song pisa ba T. 85,400 bad T. 1,90,000 na kine ki kam pyntriem jong ki.
Kat kum ka jingpyntip u Superintendent of Police ka Ri-Bhoi District, ia kine ki jingjia la register case ha Khanapara Police Station hapoh ka kyndon 395/398/397/402/506/458/34 IPC bad kyndon 27 (1) jongka Arms Act.
U Pyntip ba halor kane ka jingjia, ki Pulit ka District kila thaw ia ka Special Investigation Team (SIT) ban iarap ia u Investigation Officer ha ka jingtohkit ia kane ka kam bymman.
Ka SIT kala pynlong ia ka jingtohkit kaba bniah bad pyndonkam ia ki kor ka Forensic ban lum ia ki sakhi satar, kaba lam sha ka jingithuh ia ki briew kiba donkti ha kane ka kam.
Une u heh Pulit u pyntip ba ka SIT haduh mynta kala ioh kem ia 7 ngut ki briew kiba dei naka shnong Umbuda bad ioh kurup ruh ia ki tiar siat, ki makhor, ki jain commando bad kiwei kiwei.
Kine ki 7 ngut ki kyrteng u Kandil Marak, Rechil Momin, Wilsh Marak, Robert Momin, Marus Marak, Bimod Marak bad u Collin Marak.
Na kine ki briew, ki Pulit kila ioh ban kurup ia kawei ka suloi airgun, ka rifle shna hi, 2 tylli ki pistol shna hi, ki makhor, 9 tylli ki jain commando ba kynthup ia ki sopti bad patlun, 10 tylli ki jain iong ba sop durkhmat, 8 jur ki juti niom khlaw, bad kiwei kiwei.
Ka jingtohkit ia kine ki briew kala iaid shakhmat ban lapdien ioh dang don kiwei pat kiba dang phetrieh na ka kti jongka ain.
Pule lang ia kane: Iakren u CM bad u Himanta ba kynnoh thombor ka UPFKL ia ki Khasi-Pnar ha Block-I
Peit lang ia kane
 ban iarap ia u Investigation Officer ha ka jingtohkit ia kane ka kam bymman.){kind=link}