Shillong, Nailar 01 : U Myntri ka tnad Pule Puthi Rakkam A Sangma, ula pyntip ba ia ka kam ba iadei bad ka jingpyntreikam ia ka National Education Policy ba thymmai, yn sa rah iakren ha ka jingialang ban wan jong ka Meghalaya Higher Education Council (MEHC) ka ban long la 10 tarik Nailar.
Ha kajuh ka por, ka Sorkar Jylla kala bthah ia ka North Eastern Hill University (NEHU) ban khot pynlong ia ka jingialang jong baroh ki Khliehduh jong ki jaka Pule ka Jylla ban iakren halor ka jingpyntreikam ia ka NEP.
Haba iakren bad ki lad pathai khubor hadien ka jingialang, u Rakkam u pyntip ba ha kane ka jingialang ka MEHC, kaba un pyniaid, yn wan iashimbynta ruh da ki Heh ka NEHU bad ki nongpyniaid jong ki jaka pule.
“Ngin iakren bniah halor ka NEP. Ngin sngap ruh ia kaei kaba ki don ban pynpaw (NEHU bad college)” ula ong.
U Rakkam ula pyntip ba ka Sorkar kala dep pan ia ka jubab da ka jingthoh na ki jaka pule hapoh ka Jylla ba kin pynpaw la ki la kloi ne em ban pyntreikam ia ka NEP hynrei kiba bun kila pynpaw ba kim pat long satia kiba la khreh ban ia kane.
U Rakkam ula iakynduh ruh ia ka kynhun ki Nongialam ka Hynniewtrep Youth Council, kaba la kyrpad ia u ban tuklar lem halor ka jingrai kyrkieh jong ka NEHU ban pyntreikam ia ka NEP naduh u Nailar 2023.
Ula ong ba ka NEHU kan iaid beit shakhmat ha kaban pyntreikam ia ka NEP kat kum ka jingpynbna jong ki bad ka Sorkar Jylla kam don bynta eh hangne haba bynrap “Hynrei, ngi la dep kyrpang ia ki (NEHU) ba kim dei ban pynbor ia ki jaka pule haba pyntreikam ia ka NEP”.
Nalor kane, u Myntri ula pyntip ba ka Sorkar kala kyntu ruh ia u Vice Chancellor ka NEHU ba un lum ia ka jingialang bad ki Khlieh pyniaid jong ki jaka pule bad ban iatai sania bad ban ailad jynsur ruh ia ki jaka pule ha kaban pyntreikam ia ka NEP.
Haba pynpaw ba ka Jylla Meghalaya kam dei ban shah ieh shadien, ula ong “Ngi don ka lynti ban jam shakhmat. Hooid ngi don ia ki jingeh hynrei lada ka Meghalaya ka shah ieh, kan ym long satia kaba sngewtynnad”.
Haba kren halor ka rai jong ka Meghalaya College Teachers Association (MCTA) ban boycott ne sangeh leit shim klas ia ki 1st Semester ban pyrshha ia ka rai jongka NEHU halor ka NEP, u Rakkam ula ong “Ngan da kmen eh lad aka MCTA ka don ia ka jingialang bad ki Khlieh pyniaid jong ki jaka pule ban iakren bad wad ia ka lynti ban jam shakhmat”.
Kat kum ka jingong jong u, ki samla pule kim dei ban shah ktah naba ki dei kiba ka Sorkar ka phaikhmat bha.
Haba mynjur ba bun ki jaka pule kin shah iehshadien lada pyntreikam iaka NEP da ka hybrid mode, u Rakkam ula ong “Kane ka dei ka jingshisha naba ha ka hybrid mode, katto katne ki college kin shah ieh shadien bad ym don satia kawei ka college kaba kwah ia kane hynrei lada baroh ki rai ban nym shah ieh, ka Jylla baroh kawei kan shah ieh ia kaba ngin hap ban jied. Namar kata, ai ba ki khlieh jong ki jaka pule bad ka NEHU kin iakren sani bha ia kane ka kam. Ka lawei jong ki samla pule ka kham kongsan ia baroh ki jaka pule”.
Halor ka jingdawa ka HYC ban don noh ia ka State University, u Myntri ula ong ba haba tip ia ki jingeh jong ka Jylla bad khnang ban lah btin lynti shakhmat ia ka kam pule dangle ka Jylla, ka Sorkar kala dep ban rai ha kaban wanrah ia ka State University bala tip kum ka Captain Williamson Sangma State University, ha Tura, West Garo Hills District.
Ula ong ba ka HYC kala dawa sa kawei ka State University ka ban don ha Nongbah ka Jylla haba kular ba un sa rah iakren ia kane ka kam bad u Myntri Rangbah ka Jylla Conrad K Sangma.
