Delhi Naitung 29: U Myntri Rangbahbuh ka ri u Narendra Modi hynne ka sngi Saitjain ula plie paidbah ia ka Akhil Bhartiya Shiksha Samagam ha Bharat Mandapam ha Delhi bad kane ka iahap ruh bad ka lyngkhuh dap lai snem jongka National Education Policy 2020.
U Modi ula pyllait ruh ia ka bynta kaba nyngkong jong ka pisa hapoh ka skhim PM SHRI sha ki 6207 tylli ki skul kiba la ioh ia ka bynta kaba nyngkong ha kaba baroh ka pisa ka long T.630 klur bad ula pyllait paidbah ruh ia ki kot skul bad kot pyntbit kiba la pynkylla sha 12 tylli ki ktien jong ka ri India bad ula leit peit ruh ia ka Exhibition ne jingpyninam ha kane ka sngi.
Haba kren haka jingialang, u Myntri Rangbahduh ka ri, ula ban jur halor ka jingkongsan ka jingnang jingstad hapdeng ki bynta kiba lah ban pynkylla ia ka lawei jong ka ri.
“Ka rukom ai jingnang jingstad jong ngi ka don ka bynta kaba khraw ha ka jingpynurlong ia ki thong ba ka India mynta ka iaid,” ong u Modi bad ka ban jur ia ka jingdonkam jong ka Akhil Bhartiya Shiksha Samagam ha kaba ka donkam ban iamir jingmut bad ban iakren na ka bynta ka pule puthi.
U Modi ula ong, ba ka don ka khubor ha ka jingiaid lynti ka Akhil Bhartiya Shiksha Samagam kaba long ka jingpyniahap ia kaba hyndai bad kaba thymmai bad ha kawei ka liang, ki rukom ai jinghikai ha India ki pynneh ia ki rukom ba hyndai bad ha kawei pat ka liang, ka ri ka dang jam shaphrang ha ka saian bad ka teknoloji.
Ula ong, ba kane ka sngi kadei ka lyngkhuh dap lai snem ka National Educational Policy bad u la ai jingsngewnguh ia ki riewshemphang, ki nonghikai bad kito kiba don ha ki kam pule puthi kiba la shim ia kane ka kam kum kaba kyrpang bad kiba la shim ia la ka bynta ha ka jingiaid shaphrang.
U la kren shaphang ka jingtrei shitom jong kiba don bynta ka jingwanrah ia ki jinghikai ba thymmai ia ki khynnah rit bad ki kot ha ki ktien bapher bapher na ka bynta ki jingpule kiba kham halor bad ka ong, kiba shah hikai mynta ki sngewthuh ba ha ka jaka jong ka 10+2 mynta ka 5+3+3+4 ka dang treikam.
Ula pynbna ba ka Sorkar Pdeng kala ai jingmynjur ban wanrah ia ka National Research Foundation Bill ha ka ïing dorbar thaw aiñ Parliament bad shen kan sa don ka National Curriculum Framework hapoh ka NEP bad ka ri baroh kawei kan don kawei ka jinghikai bad ka NCERT ka dang pynkhreh ia ki kot ba thymmai na ka bynta kane.
U Myntri Rangbahduh ula pynbna ba mynta ki dang pynkhreh ia ki kot ba thymmai na ka bynta 130 tylli ki sobjek ba ka bynta ki klas 3 haduh 12 ha 22 tylli ki ktien na ka bynta ka jingai jinghikai ha ki ktien tynrai bapher.
Ula ong, watla ka India ka bun ki ktien tynrai kiba la skhem, ia kine la iohi kum ka dak jong ka jingsahdien bad kito ki bym nang ban kren ia ka ktien phareng ki shah iehbein watla ki long kiba don sap bad kiba tbit ha ki kam, namar kane, ki khynnah ha ki jaka nongkyndong ki shah ktah bha bad ka ri ka la sdang ban kyntait ia kane ka jingngeit hadien ka jingwan jong ka National Educational Policy.
“Ka jingpeit bniah jong ka NEP kadei ba baroh ki khynnah ka India ki dei ban ioh ia kajuh ka jinghikai bad kijuh ki lad ban ioh jingnang jingstad,” ong u Modi bad ka bynrap ba kane kan ym sah ha tang ka jingplie ia ki skul.
U Myntri Rangbahduh ula kren shaphang ki sienjam ban pyniasoh ia ki jinghikai ban ioh kam bad ka pule puthi bad ki rukom trei ban kham pynsngewtynnad ia ka pule puthi.
“Kano kano ka jingpynkylla ka donkam ia ka jingshlur bad ka jingdon ia ka jingshlur ka ialam sha ki lad kiba thymmai, ong u Modi bad ka bynrap ba ka pyrthei ka peit sha ka ri India kum ka jaka pdeng jong ki lad kiba thymmai.
Ha kane ka jingialang la iadonlang u Myntri ka Sorkar Pdeng uba khmih ia ki tnad Education bad Skill Development & Entrepreneurship, u Dharmendra Pradhan, ki heh ophisar ka sorkar pdeng bad kiwei kiwei ki heh ki haiñ.
Pule ruh: Bynniaw ka TMC ba shah kynnoh ki seng sain pyrthei halor ka jingkulmar ha Tura
