Nongpoh, Naitung 28: Ka Synjuk ki Rangbah Shnong ka Ri-Bhoi District, kila rai ban ujor da ka mukotduma sha ka Iingkashari Meghalaya High Court pyrshah ia ka Sorkar Jylla halor ka jingkynnoh kheinsting bad jingbym shimkhia ban pyllait ia ka pisa jong ka skhim MGNREGA mynta la arsnem.
Ia kane la iathuh da General Secretary ka Synjuk Bah PB Sylliang ha ka jingiakren bad ki Nongthoh Khubor ha Nongpoh hadien ka jingialang jong ka Executive Committee.
U Bah Sylliang ula ong ba ki jingud jingnam jong ki Dorbar Shnong ka Ri Bhoi District lyngba ki VEC bapher bapher sha ki bor ka sorkar jylla ka la shu kut beit tang ha ki kot sada mynta la 2 snem tam.
“Namar kata, ka Synjuk ka la rai ban khot shwa da ka jingialang jong ki VEC na ki 4 tylli ki Block ka Ri Bhoi District ban shim ia katei ka rai kaba tyngeh”ula ong.
La kyrpad ia u Chairman bad Secretary jong ki VEC na saw tylli ki block ba kin wan shimbynta sha katei ka jingialang ba kynthup ia Umsning bad ka Bhoirymbong Block, kaban sa long ha ka 4 tarik u Nailar 2023 ha Umsning bad na ka bynta ka Umling bad Jirang Block kan sa long ha ka 7 tarik u Nailar 2023 ha Iewmawlong.
“Ngim banse ban shim ia ka rai ban phaikhmat noh sha ka iingbishar jong ka jylla Meghalaya, namar ba ma ngi kum ki nongialam shnong khamtam ki nongkitkam jong ki VEC ngim sngew lah shuh ban pyntrei ia ki kam pynroi lyngba ka skhim job card lane ka MGNREGA tang namar ka jingbym pynlait pisa bai tiar bad kiwei kiwei da ka sorkar jylla watla la iai ud iai nam sha ki bor ba dei peit na ka por sha ka por. Mynta wat kito kiba ju ai ia ki mar ki mata ruh kim lah shuh ban kyrshan ia ki VEC ha ki jingtrei ba bunjait te kumno ngin lah ban pyntrei ia kine ki kam ha ki shnong ki thaw”, ong u Bah PB Sylliang.
Ha kajuh ka por SKRS, ka la pynpaw ruh ia ka jingsngewkhia kaba jur halor ka jingpynbna ba ka jylla Meghalaya ka la shah kynthup ha ka thup jong ki jylla kiba duk tam ha ka ri lyngba ka NITI Ayog, kaba la pynlehrain shikatdei eh ia kane ka jylla Meghalaya kaba la kynjoh ruh sha ka rta kaba 50 snem.
U Bah Sylliang, u la ong ruh, ba ka SKRS ka la kdew ba kawei na ki daw bah kumba la sakhi ha Ri Bhoi District, ka dei ka jingleh mon jong ki nongtreikam sorkar ne ki ophisar jong ki tnat treikam sorkar kiba ju leh mon ha ka leit ka wan trei khlem da bud thik ia ka por ba la buh da ka sorkar jylla, kaba la ktah shikatdei ia u duk u suk khamtam ki nongialam shnong jong ki shnong kiba kham pajih kiba ju beh ia ka por ban pyndep ia ki kam ki jam khamtam ha ka roi ka par.
Nalor kane, ka SKRS kala pynpaw ruh ba shen kan sa leit iakynduh ia u CEM ba thymmai ka KHADC ban iakren ia ki kam ki jam jong ki shnong ki thaw ka Ri-Bhoi kiba iadei bad ka District Council.
