Shillong, Naitung 27 : U Symbud Myntri Rangbah ka Jylla ba khmih ia ka kam Pohiing Bah Prestone Tynsong ula ong ba ka jinghiar thma jong ki paidbah ia ka Chief Minister Office (CMO) ha Tura katba dang iaid ka jingiakren hapdeng u Myntri Rangbah ka Jylla bad ki Sengbhalang, ka dei ka kam “iasylla sain pyrthei” namar bun kiba shah kem ki dei ki Dkhot jong ki seng sain pyrthei bapher bapher.
Haba iakren bad ki nongthoh khubor ha ka sngi Palei, u Symbud Myntri Rangbah ula ong ba haba pynshong nongrim na ki briew ba shah kem haduh mynta, jan baroh ki briew bala kem ki dei ki dkhot jong ki seng sain pyrthei.
“Kine baroh ki dei ki kam sain pyrthei, ka buit sain pyrthei bala leh da ki katto katne ki seng sain pyrthei. Hynrei, ngam kwah ban kren than ia kane hynrei ailad ia ka ain ba kan iaid hala ka jong ka lynti” ula bynrap.
U Bah Prestone ula ong “… Ka Jingkhein jong nga hi ka shai bha, naba bun kiba shha kem ki dei jong ka Party A, B bad C, khatduh hi ka paw ba kane ka dei ka kam iasylla sain pyrthei, dei ka buit sain pyrthei ym ka jingsngew iapher jaidbynriew hynrei ka buit sain pyrthei jong ki seng sain pyrthei. Watla nga lah ban kren kut kumta hynrei ai ba ka jingtohkit kan wad ia baroh ki jingshisha bad hadien kane ngin sa tip ia ka daw ba thikna”.
Haba kylli halor ka jingdawa jong ka AITC ban wengkam shipor ia u DGP ka Meghalaya bad SP ka West Garo Hills, u Symbud Myntri Rangbah ula ong ba kino kino ki seng sain pyrthei ki lah ban sei ia ki jingdawa hynrei ka long pat kaba donkam ban peit ia ka jingshisha baroh.
Hynrei, u Symbud Myntri Rangbah ula ai ka jingiarop ia ka jingsted treikam jong ka Tnad Pulit ha kaban kem ia ki briew kiba donkti ban thaw jingkulmar.
“Nga da kmen bha ia ka Tnad Pulit ba kala shim ia ka sienjam ha ka pork aba dei bad kila lah ban trei bha ha kaban pynneh ia ka shongsuk shongsain” ula ong. Ula ong ruh ba ki Pulit kila dei ban khang leh tyngeh bad kham smat ha kaban tehlakam ia kum kine ki jingjia hapoh ka Jylla.
Haba pynpaw ba kane ka jingpynkulmar kam dei satia tang ka jingthmu ban pynmynsaw ia u Myntri Rangbah ka Jylla hynrei ka dei ka jingpynjot kaba ktah ia ki paidbah salonsar.
“Ka khyllipmat ba ki kwah ban thaw jingkulmar ka mut ba ka jingjot kan leit sha ki paidbah la ka dei ki ba riewspah ne kiba aduh” ula ong.
 ha Tura katba dang iaid ka jingiakren hapdeng u Myntri Rangbah ka Jylla bad ki Sengbhalang, ka dei ka kam “iasylla sain pyrthei” namar bun kiba shah kem ki dei ki Dkhot jong ki seng sain pyrthei bapher bapher.){kind=link}