Kohima, Naitung 27 : Uwei u Pulit Inspector ka Nagaland bad san ngut kiwei pat kynthup kawei ka Kynthei kila shah kem halor ka jingpyrshang ban die tuh ia ki kuli na ka Central Store jong ka Tnad Pulit.
Palat 2000 tylli ki kuli kila shah tuh naka jaka buh tiar siat jong ka Tnad Pulit. Ka Tnad kala thung mynta ia ka Committee ba kan tohkit ia kane ka jingjia.
Haba iakren bad ki nongthoh khubor, u Commissioner of Police ka Dimapur Kevithuto Sophie ula ong “Ngi la lap ba u briew ba hakhmat eh u dei u Inspector Michael Yanthan bad ula phla ruh ia kane ka kam bymman ba ula tuh bad die ia kine ki kuli”.
Kane ka jingtohkit jong ki Pulit pyrshah ia ka jingshah tuh ki kuli kala sdang naduh ka 9 tarik Naitung hadien ba la lap ia ka jingduna ki kuli haba leit khmih bad buh jingkhein.
“Ki Pulit kila buh ia ki jaka talasi ha kylleng ki jaka ka NH 29 hynrei kim shym la iohkem satia iano iano ruh hynrei dei ha ka 10 tarik Naitung ba kila ioh bat ia kawei ka kali ha 6mer kaba ha Chumoukedima bad ha ka jingtalasi kila lap ia bun bah ki kuli bala thep ha ki lai tylli ki byrni khaw” ong u Sophie.
U pyntip ba ki Pulit ki la kem ia arngut ki briew bad ha ka jingtohkit, kila phla ba ia kine ki kuli la leit ban shim n aka iing sah jong ka kurim uwei u dkhot NSCN(IM) uba la khlad noh.
U Yanthan ula pdiang ia ka jingbahkhlieh ba tuh bad die ia kine ki kuli nalor ka jingphla ba ula iohpdiang haduh T. 4.52 lak na uweiu briew uba thied haduh 1500 tylli ki kuli SLR bad 1000 tylli kikuli 5.56 mm jong ka INSAS Rifle.
