Shillong, Naitung 11: Ka Hynniewtrep Youth Council (HYC) hynne ka sngi nyngkong, kala dawa ia ka Sorkar Jylla ban thung da ka jingtohkit halor ka jingkynnoh trei bym hok, jingbam klop ia ka pisa paidbah bad ka jing ai jingmyntoi bym hok ia kawei ka kompani da ka Directorate of Printing and Stationery.
Ha ka shithi ujor sha u Myntri Rangbah ka Jylla Conrad Kongkal Sangma, u General Secretary ka HYC samla Roykupar Synrem ula ong ba ka Sorkar ka dei ban tynrong ia ka jingbahkhlieh ha baroh ki briew kiba donkti ha kane ka kam ba beain.
“Bad katba ka jingtohkit ka dang sah, la dawa ban sospon shuwa ia u Director ka Tnad Printing and Stationer kat kum ka Rule 6(1) (a) jong ka Meghalaya Civil Service (Discipline and Appeal) Rules, 2019, khnang ba ka jingtohkit kan long kaba khuid, kaba laitluid bad ban nym ailad ia une u Director ba un pynjulor ia ki sakhi satar, ki ot ki sla bad ruh ban khanglad ia u ha kaban pyndonkam bakla ia ka bor ban pynbeij ia ki briew kiba don bynta ha ka jingtohkit” ula ong.
U samla Roykupar ula pyntip ba kat kum ka jingtip na ka RTI bad ba mih ha ki lad pathai khubor, ka kaiphod CAG kala lap ia shibun ki jingtrei bymhok hapoh ka Tnad Printing & Stationery, kaba lam sha ka jingbam klop ia bun bah ka pisa u paidbah kaba dei jong u snem 2010 haduh 2022.
Ula kdew ruh ia ka jingshem jong ka Ophis u Principal Accountant General (Audit), Meghalaya, Shillong jong u bnai Rymphang 2010 haduh Naiwieng 2019 ba ong “Ka jingpynlut khlem ioh jingbit ban thied ia ki tiar na ki supplier bym shah jied- u Director ka Printing and Stationer ula buh ia ka supply order ba T. 87.58 lak na kawei ka kompani kaba ka Purchased Board Committee jong ka Directorate kala kyntait ia ka tender namar ka jingbym lah pynbiang ia ki jingdonkam bala buh”/
Ka jingpynlut ba lah ban kiar kaba kot haduh T.203500 namar ka jingthied khem jingbit ia ka single colour sheetfed offset machine na kawei ka kompani, da kaba thied ia kajuh ka mar kaba la tyrwa rit dor da kawei pat ka kompani.
La lap ruh ia ka jingphah shon ia ki kot ki sla sha ka kompani shimet khlem da iaid kat kum ka lynti kaba dei kaba lam sah ka jingpynlut ba khlem da ioh jingbit haduh T. 121.89 lak. Kane ka iadei bad ka jingphah shon kot da u Mission Director ka Stater Health Society (NHM) Meghalaya ha u snem 2015 ha kaba ka Directorate kala ai ia kane ka kam sha ki artyli ki kompani khlem da khot tender.
Une u Nongialam ka HYC ula kdew ruh ia shibun kiwei pat ki jingtrei bym hok kiba iaid ha kane ka tnad ba kynthup ia ka jingthied kor Computer, ka jingsiew bym hok haduh T. 127.73 lak ha ka jingphah shon kot namar ka jingbym treikam haba shit ba shai jong ka Tnad bad kiwei kiwei.
