Shillong, Naitung 22: Ka NEHU Student Union (NEHUSU) hynne ka sngi kala pynpaw ka jingsngewdiaw bad ka jingpyrshah halor ka jingrai kyrkieh u Vice Chancellor (VC) ka skulbah ban pyntreikam iaka National Education Policy (NEP) 2020 naduh 1 tarik Nailar 2023.
Haba kren sha ki lad pathai khubor u Finance Secretary ka NEHUSU samla Mandor Diengdoh Swer ula ong ba ki don shibun ki mat haka NEP 2020 kiba long kiba sngewtynnad bad kiba shongnia ban kyntiew bad ban wanrah jingkylla iaka pule puthi ha baroh kawei ka ri India bad Meghalaya.
“Ngim pyrshah iaka NEP hynrei ngi sngew ba kane ka rai jong u VC ban pyntreikam naduh 1 tarik Nailar ha baroh ki College kiba hap hapoh ka jingkhmih ka NEHU ka long kaba kyrkieh palat namar ki dang don shibun ki kam ba donkam ban leh naka bynta ban pynthikna ba ka jingpyntreikam iaka NEP ha Meghalaya kna long kaba iaid beit iaid ryntih” la ong u samla Mandor.
U samla Mandor ula ong ba donkam sa kumba shi snem eiei ban pynkreh iaki jingdonkam naka bynta ban pynthikna ba ka jingpyntreikam iaka NEP ha Meghalaya kan long kaba seisoh bad kaba iaid beit iaid ryntih.
Ula kam ba ki dang shibun ki College bad ki jaka Pule ha kylleng ka Meghalaya kiba dang duna ha ka jingdon ki nonghikai kiba tbit iaki sobjek bapher bapher bad ki don ruh ki College ha sor bad khap sor ki bym don lut ki tnat Pule.
Haba bynrap ia kane, u Vice President ka NEHUSU u samla Easterson Sohtun ula ong ba kane ka jingrai kyrkieh jong u VC ban pyntreikam noh iaka NEP naduh 1 tarik Nailar 2023 ka paw hi ba une u VC ula shim rai marwei khlem da khein snep iaka rai jong ka Academic Council ka NEHU.
U samla Easterson ula ong ba wat naka liang u Myntri ka tnat pule puthi Rakkam Sangma dang shen ula kren shai ba ki don ki College ha Meghalaya ki bym pat kot bor ban pyntreikam iaka NEP mynta u snem bad dei namar kane ba ki nonghikai bad ki samla pule ki sngewdiaw bha halor kane ka jingrai kyrkieh u VC.
Also read: Pynsangeh ka Supreme Court ia ka hukum u DC ka EJH ban pynpra ia ki karkhana coke be-ain
 hynne ka sngi kala pynpaw ka jingsngewdiaw bad ka jingpyrshah halor ka jingrai kyrkieh u Vice Chancellor (VC) ka skulbah ban pyntreikam iaka National Education Policy (NEP) 2020 naduh 1 tarik Nailar 2023.){kind=link}