Shillong, Naitung 20 : U Myntri Rangbah ka Jylla Conrad K Sangma ha ka sngi Palei, ula pyntip ba ka Sorkar Jylla kala pan por ban iakynduh ia u Myntri kam Pohiing ka Ri Amit Shah ha kaban iakren halor ki ishu bapher bapher ka Jylla kynthup ia ka jingpyntreikam ia ka Inner Line Permit (ILP).
“Hooid, ngi la phah ia ka jingkyrpad. Ha ka kyrdan shimet ruh ha ka jingialang jong ka NDA ba dang shu dep, nga la iakren bad u Myntri kam Pohiing bad iathuh ia u bad ngan sa wan bad ka Kynhun Myntri ban iakynduh ia u halor ki ishu kiba bun jong ka Jylla” ong u Conrad haba iakren bad ki nongthoh khubor” ong u Conrad.
Ula iathuh ruh “Ha kane ka jingleit iakynduh ia u (Amit Shah) ha kat ka por ba u ai, ngin sa rah iakren ia kiwei ki ishu kynthup ia ka ILP”.
Halor ka Uniform Civil Code (UCC), u Conrad ula ong ba kam don nongrim satia ban iakren halor ka UCC namar ba um pat iohi satia ia ka draft bill.
“Ka dei kaba eh bha, ka dei ka kam ba kynrum kynram bha bad kumno yn wanrah ia ka bad ha kano ka dur ban wanrah ia ka ruh ngim pat tip. Kumta, katba ym pat wanrah nga sngew ba kan long kaba eh ia nga ban kynthoh eiei bad nga sngew ba kam don nongrim ruh ia ngi ban iakren” ula ong.
“Hadien bala mih ka draft, hangta ngin sa lah ban iashong bad lehse ban iakren ia kaei ka bynta lane kano ka para kaba ngi lah ban pdiang ne kumta bad kaei kaba ngi dei ban leh. Tad haduh katei ka por, nga sngew ba kam donkam ban iakren ia kane” ula bynrap.
