Imphal, Naitung 19: Ka video ba pyni ia arngut ki Kynthei ba shah pyniaid lyngkhuit ha ka paidbhur shynrang ha surok ka Jylla Manipur, kala saphriang ha ki rynsan social media hapdeng ki jingkynthoh pynrem jong kiba bun balang kiba la dawa ruh ba dei ban leh eiei mardor pyrshah ia kine ki briew ba donkti.
Ka Indigenous Tribal Leaders’ Forum (ITLF) kala kynnoh ba kine ki arngut ki Kynthei kila shah leh beijot ruh ha kine ki paid bhur ha kawei ka lyngkha. Kane ka jingjia kala jia ha ka 4 tarik Jymmang ha Kangpokpi District, kaba jngai kumba 35 km na Imphal.
Kane ka jingjia ba ishyrkhei kala jia ha ka por ba dang jur ka jingiaumsnam hapdeng ki jaidbynriew Meitei bad ki Kuki, kaba la khie namar ka jingpyrshah ia ka jingdawa ki Meitei ban ithuh kum ki Schedule Tribe ka Jylla.
Ka ITLF kaba mihkhmat ia ka jaidbynriew Kuki, kala ong ba kine ki Kynthei ki dei na ka Jaidbynriew Kuki haba dawa ruh ia ka National Commission for Women bad ka National Commission for Schedule Tribe ba kin leh eiei mardor halor katei ka jingjia.
Kane ka Video ba ipangmet, kala pyni ia ka jingshah leh tohmet kine ki Kynthei hapdeng ka jingkyrpad ban map ia ki katba ki dang shah patan sha ka lyngka. Kaba kham ipangmet ka long ba ki nongleh ia kane ka kam kila pynsaphriang ia ka video ha ki social media, kaba la nang thad ia ka longrynieng jong kine ki lanot.
Kumba long mynta, ki Pulit ka Manipur kim pat ai satia kano kano ka jingkynthoh halor kane ka kam, kaba pynmih ia u dak jingkylli halor ka jingkem ia ki briew ba donkti lane ban register case pyrshah ia ki.
Ki riew sain pyrthei bad ki nongshongshnong kumjuh kila pynpaw ia ka jingbitar ha ki rynsan social media halor kane ka jingshah leh tohmet kine ki kynthei bad kyrpad ia ka Sorkar Pdeng bad Sorka Jylla ban leh eiei mardor pyrshah ia ki briew kiba leh ia kane ka kam.
