Nongpoh, Naitung 19: Ka seng Confederation of Ri Bhoi People (CoRP) ha ka sngi Balang, ka la leit tur sha ka ophis jong ka Indian Council for Agricultural Research (ICAR) Umiam, ban dawa thungkam biang ia ki 3 ngut ki Nongtrei Khasi kiba shah wengkam khlem kano kano ka Nongrim.
Kane ka Seng bala ialam da u President Bandari Ryntathiang, kala buh ia kane ka jingdawa hakhmat jong u Chief Administrative Office Senior Grade u GG Harakangi bad u Gauranga Ghosh u ba dei u Senior Finance and Account Officer ka ICAR, Umiam.
Haba kren bad ki Nongthoh Khubor, u Bah Bandari Ryntathiang u la pynpaw ia ka jingsngewkhia kaba jur bad ka jingbitar halor ka jingleh jong kane ka tnad ICAR na ka por sha ka por ban shu wengkam khlem nongrim ia ki nongtrei khasi bad ha kane ka kynti ruh sa ia kitei ki 3 ngut la shu wengkam khlem don kano kano ka daw.
U la iathuh ruh, ba katkum ka jingtip jong ka seng, ka ICAR ka ju wengkam ia ki nongtrei khasi tang namar ka jingwan jong kino kino ki scientist ne ki ophisar na kiwei kiwei ki jylla kiba ju wan ialam lang ia kiwei pat ki nongtrei ha ryngkat bad ki. Ka kynnoh b aka ICAR ka ju wengkam iaki Nongtrei Khasi ban ioh thung kam ia kine ki bar jylla.
“Man ka por haba wad jingtip halor ka jingwengkam khlem nongrim ia ki nongtrei khasi, ka jubab ba ki ophisar ka tnad ICAR ki ju ai ka long, ba ka project ba kine ki nongtrei khasi ki ju trei ka la kut noh bad kim don pisa ban siew tulop ia ki, katba ia ki bar jylla kiba la wan ialam da ki ophisar thymmai pat lane ki nongtrei bar jylla kiba la trei lypa ruh haba kut kano kano ka project ki ju thep kam pat sha kawei ka project kaba thymmai”, ong u Bah Bandari Ryntathiang da kaba buh jingkylli balei ka ICAR kam lah ban thep kam ia ki nongtrei khasi na ka project barim sha ka project kaba thymmai.
Shuh shuh ruh, u la pyntip, ba na ka liang u Chief Administrative Office Senior Grade ka ICAR u la pyntip, ba shen un sa khot ia ka jingiakynduh lang ban pynbeit mardor halor ka jingshah wengkam jong ki nongtrei khasi.
