Shillong, Naitung 18 : Ki bor District ka West Khasi Hills, kila dep ban pynpra ia ki atoskhana jong ki 13 tylli ki karkhana coke be-ain ba don hapoh ka District bad lah buh thong ba hapoh 30 sngi, yn sa lah ban pynpra lut ia baroh 57 tylli ki karkhana be-ain.
Ia kane la pyntip da u Deputy Commissioner ka District lyngba ka kyrwoh haba pyntip ruh ba ki bor District kila dep ban kem haduh 6 ngut ki briew kiba dei ki trai jong kine ki karkhana ia kiba la register case hapoh Shallang Police Station lyngba ka PS Case No.39(12)2022U/S188/34/379/120BIPC R/w Sec 15 Environment (Protection)Act, Sec 3 jong ka Explo-sive Substances Act bad Sec 51(1), Benami Transaction (Prohibition) Act, 2016.
Kine ki 6 ngut ki kynthup ia u Youdishthra Bham na Assam, u AshishArya na Guwahati Assam, u Khrawbok Rongrin na Shallang, u Hopeful Nongtdu na Rymbai Synrang, East Jaintia Hills, u Yaman Bansal na Beltola, Guwahati Assam bad u Eras Dkhar na Nongstoin, West Khasi Hills.
U Deputy Commissioner u pyntip ba ki karkhaan coke beain bala pynpra ia ki atoskhana ki dei kiba don ha Nonglangpar (Kyllonmathei) kiba don ha ki co-ordinate (i) 25.5220613, 90.9035105 (ii) 25.5224573, 90. 8992605 (iii) 25.5201515, 90.9032912 (iv) 25.5185800, 90.9041877 (v) 25.5174384, 90.9062416 (vi) 25.5128946, 90.9028738 (vii) 25. 5138295, 90.9038863 (viii) 25.5146504, 90.9051718 (ix) 25.5146671, 90.9067402 (x) 25.5177594, 90.9006992 (xi) 25.5191951, 90.9023759 (xii) 25.5214483, 90.9009416 bad (xiii) 25.5212888, 90.8993075
Lah ban kdew hangne ba ki don haduh 57 tylli ki karkhana coke ba beain hapoh ka thain Shallang bad ka bor District kala dep ban khang tala ia kine ki karkhana naduh u bnai Nohprah 2022 hadien ka jingbthah jong ka Iingkashari Meghalaya High Court.
U Deputy Commissioner u pyntip ba ha u bnai Rymphang haduh Iaiong 2023, ki bor District kila pynpra noh ia ki jaka shet bad ki pipe ba pyniasoh bad ki atoskhana jong kine ki karkhana beain ban pynthikna ba kin ym lah shuh ban dang treikam.
Haba pyntip ba katba ka bor District ka dang ap ia ka kaiphod naka Committee bala thung da ka Sorkar, kaba khein ba diah halor ka jingdon u dewiong ha kine ki karkhana (Audit Committee on Source of Coal), ka bor District kala khang haduh saw tylli ki karkhana ki ba don ia ki kot ki sla kiba biang (Valid CTE, CTO) bad kine ki kynthup ia ka M/s Shemphang Riangshiang,Pyndeng Jalong,Doranggri,Shallang, M/s Rilyngngam cok Industries, KyllonMathei, Shallang, M/s M.D.Coke Industries bad M/s Carbochem India kiba don ha ka shnong Nongdakong,Shallang.
Hadien ba ioh jingmynjur na ka Sorkar Jylla hapoh ka jingialam bad jingkhmih jong u Bah H.K. Thabah, MCS, Additional Deputy Commissioner, I/c Mawshynrut Civil Sub-Division, la thaw ia ka kawei ka kynhun kaba kynthup ia ki Gazetted Police Officer, Meghalaya State Pollution Control Board, Commerce bad Industries na ka bynta ban pynpra bad pynbthei noh ia ki Atoskhana jong ki 57 tylli ki karkhana sain dewiong beain kiba la shna khlem ka CTE.
Na ka bynta ka bha ka miat bad ka suk ka sain jong u paidbah, la pynjari ia ka hukum hapoh ka kyndon 144CrPC kaba la pynmih ha ka 11.07.2023, ban khang pyrshah ia ka iaid ka ieng jong ki paidbah ne kino kino ki kynhun ha ka radius ka ba 1 km na ka jaka ba don kitei ki karkhana sain dewiong beain. La bthah ruh ia ki paidbah ba kin iatreilang bad ki bor synshar District katba kane ka kam ka dang iaid, bynrap shuh shuh u Deputy Commissioner.
Pule lang ia kane: Prong tuh ki runar ha ophis ka KHADC ha Mawkyrwat
