Shillong , Naitung 13: Ka Voice of the Peoples Party (VPP) hynne ka sngi Palei, kala pynpaw iaka jingsngewtynnad ba ka Sorkar kala pynsted ia ki kam ki jam ba iadei bad ka Expert Committee kaba sah mynta sa tang ban thung ia u Chairman jong ka Committee.
U President ka VPP Bah Ardent Basaiawmoit ula ong ba ka jingleit iakynduh ia u Myntri Rangbah ka jylla Conrad K Sangma ka dei ban buddien ha kaba iadei bad ka jingdawa ban phah pynbeit thymmai noh ia ka Reservation Policy jong ka jylla.
“Ka jingiakynduh ka long kaba sngewtynnad haba u Myntri Rangbah ula pyntip ba ka sorkar kala pynsted ia kane ka kam bad kaba sah mynta ka dei sa tang ban rai ia u Chairman jong ka Committee” ong u Bah Ardent haba iakren bad ki nongthoh khubor.
Ula iathuh ba ka sorkar kala pynpaw ba kam kwah ban leh kyrkieh ia kane ka kam namar ba kadei ka ishu kaba eh bad kam dei ka ishu kaba jem, kumta ka VPP ka kwah ban ailad iaka sorkar ba kan pyntyllun ia ki kam.
“U Myntri Rangbah ula pynpaw ba mynta kaba sah ka dei sa tang u Chairman bad kila paw ki kyrteng kaba kin iapyrkhat ia ba kin thung kum u Chairman . U Myntri Rangbah ula pynpaw ba kan shim por sa 2 ne 3 taiew ban thung iaka Committee bad ia u Chairman bad ngi sngew ba kane ka jingiakynduh ka jong ngi ka long kaba jop” ong u nongialam ka VPP.
Halor ka jingkylli la ka VPP ka hun ba ha ka Expert Committee yn thung ruh da ki briew kiba na shabar, u Bah Ardent ula ong, “Balei ngi ong naduh ka sngi kaba nyngkong iaka sorkar ban thaw iaka Expert Committee, ngi ngim kwah ba ka VPP kan shim halade ia kata ka sienjam ban batai nadong shadong kumno ban pynkylla ia ka Policy bad dei na kata ka daw ngi tyrwa ia ka sorkar ban thung iaka Expert Committee”.
“Ka jingiakren ka jong ngi bad ka sorkar ka long ban thaw iaka Expert Committee ba kan pynbeit thymmai iaka Reservation Policy bad ka mat kaba ngi kham kwah ka long ban iakren halor ka jingbhah hapdeng ka jong ngi bad ki Garo na kane ka 40:40 kaba ngi la kren bad ngi la ai jingmut ba kadei ban long katkum ka jingdon paid” ong u Bah Ardent.
Ha kaba iadei bad ka jingkren ka Myntri ka tnad Aiñ Kong Ampareen Lyngdoh ba ki seng saiñ pyrthei kim shym la ai jingmut sha ka Committee ne ka sorkar jylla lait noh tang ka seng KHNAM, u Bah Ardent ula pynshai “Ba ka pyrthei ka tip shai iaka nongrim kaba ka VPP ka ieng bad ngi lah iakren bad u Myntri Rangbah ba balei kane ka mat ka mih shi mih.
Phi khmih lynti aiu na ngi, haba ngi lah dep ong ban thung iaka Expert Committee, kaei ka kam jongka Expert Committee lada ma ngi, ngi la ai noh ia ki jingai jingmut. Ka Expert Committee ka dei ban trei iala ka bynta ban pynbeit thymmai iaka Reservation Policy bad u Myntri Rangbah yn sa pynshai halor kane ka bynta”.
“Kam don jingmut ban kren ia kajuh shi kajuh, ba ka VPP kam pat ai jingmut bad kam donkam ruh ban ai jingmut hynrei kaba kongsan kadei ba kane ka Expert Committee kan sdang ban pyntyllun ia ki kam kumno ban khmih bniah ban pynbeit thymmai iaka Reservation Policy bad ngin sa peit ia ka kaiphod jongka Committee, la ngi dang donkam ne em ba ngin kren ne ngi la hun ia ka jingpynbeit jongka Expert Committee” ong u nongialam ka VPP.
U Bah Ardent ula iathuh ruh, ba ka VPP kala iakren ruh bad u Myntri Rangbah ha kaba iadei bad ka jingpynmih hukum ka Deputy Commissioner iaka jingpynjari iaka kyndon 144 CrPC kaba la bthah ia ki dukan ha nongbah Shillong ba kidei ban khang noh ha ka por 10 baje mynmiet bad ka VPP kala pynpaw ba ka sorkar kadei ban pynkylla noh ia kane ka hukum.
Ula ong ba kila pynsngew ruh ha kaba iadei ka jingkiew dor ki marbam mardih khamtam eh u khaw, ka jingkiewdor ki mar rep, ka jingpyntreikam iaka Load Shedding kaba la ktah jur ia ki paidbah bad na ka liang u Myntri Rangbah ula kren shai ba ka sorkar kan shimkhia ia kine ki mat.
