Mawkyrwat, Naitung 13: Ka kynhun ki Hati khlaw kila pynjulor haduh 14 tylli ki Iingtrei jong ki Nongrep ba don ha ka thain Nongnah, South West Khasi Hills District nalor ka jingpynjot pynjulor ia ki jaka rep.
Kane ka dei ka sien kaba lai ba ki Hati khlaw kila wan poi ha kane ka thain tang ha une u snem ba mynta bad la iathuh ba ki Hati kiba don ym duna ia 10 tylli, kila wan kiew ruh shaduh u Lum Iawpaw ban wad jingbam.
Ki Nongshongshnong ka thain ki pyntip ba kane ka jingwan pynjulor ki Hati kala jia ha ka 3 tarik Naitung ha kawei ka jaka rep bala tip kum ka Nongijngai, kaba hap hapoh kathain Nongnah.
La iathuh ba kane ka jingjia kala jia ha ka por mynmiet bad jia ryngkat ruh ba ki nongrep kim shym la don satia sha ki jaka rep ne sah ha kine ki Iingtrep.
Ki nongshongshnong kila kyntu ia ka Tnad Wildlife ba kan leh eiei noh halor kane ka jingwan pynjulor ki Hati khlaw ia ki jaka rep haba maham ba lada ka Tnad kam lah leh eiei, kim banse ban leh hi ia kaba donkam.
Ki iathuh ba ki paid nongrep mynta kila sheptieng ban leit shala ki jong ki jaka rep namar ka jingdon bad jingiai wan pynthut jong ki Hati Khlaw.
Pule ruh: Khapngiah ki surok ha sor Shillong ba iakhih ki Taxi naka Odd-Eeven Number ka DC
