Shillong, Naitung 10: Ka Khasi Hills Autonomous District Council (KHADC) kala rai ba kan thung ia u Chartered Accountant (CA) u ban leh Audit ia baroh ki Account jong ka Council, ban dup lah pynbeit ryntih ia ka pla iarong tyngka jong ka Council.
“Ngi la rai ban thung ia u Chartered Accountant (CA), u ban sa ialam lang bad ka kynhun ban leh ia ka jingtohkit ia baroh ki Account khnang ba ngin lah ban pynbeit ryntih ia ki” ong u Bah Titosstarwell Chyne, Chief Executive Memebr (CEM) ka KHADC.
U CEM u pyntip ruh ba ka Council kan sa pynmih ia ki kaiphod Audit shisien ha ka lai bnai.
“Kane ka long namar ka jingbym don satia ka jingpyntreikam thikna ia ka Financial Rules ha ka Council” ong u CEM haba bynrap “Phi la iohi ha ka kaiphod CAG, ki Tnad treikam kim shym la buh jingkhein wat ka Cash Book.
U Bah Titos u ong ba kane ka rai ka dei kaba la shim ruh hadien ba u Chaukidar ka Tnad Forest ula bamklop ia ka pisa ba palat T. 34 lak na ka khajna ba ioh lum da ka Council lyngba ka Tnad Forest. Ka Council kala rai ban phahsiew ia kane ka pisa baroh na une u Choukidar da kaba shu khate na ka tulop ba T. 10000 manla u bnai. Hynrei shibun ki jingkylli kila mih halor ka rai bala shim da ka Council pyrshah ia une u Choukidar.
Haba kylli ba hato ka jingailad ia une u Choukidar ban siew pat ia ka pisa ha ka jaka ban ai ka jingpynsajia kat kum ka ain, kan long ka jingpynshlur ia kiwei ha ka Council, u Bah Titos ula ong ba kane ka rai bala shim ka dei kat kum ka jingai jingmut jong ka Inquiry Committee haba pynksan ruh ba kane ka sienjam bala shim ka dei kaba la pynshong nongrim ruh na ka jingsngew para mynsiem briew.
“Ula leh ia kane ka kam bymman bad ha kajuh ka por ula phla bad kwah ban siew noh ia kane ka pisa ba ula pyndonkam bakla. Ngi sngew ba lada u briew ula kubur bad kwah ban siew noh, ngi dei ban ailad namar ka long hi kum ka jingpynsajia ia u. Hynrei une u Choukidar un nym ioh shuh ia ka GPF ne kiwei kiwei ki jingmyntoi. Dei ba ngi phah kem ia u, kaei ka ban jia ia ki Khun ki Kti jong u bad mano ban peit ia ka iing ka sem jong u, ngi dei ban pyrkhat ruh ia kane ka bynta” ula ong.
Haba kdew ia ka kaiphod kaba kynnoh ba u CFO un hap ban siew T. 1 lak manla u bnai ban siew ia ka pisa ba ula pyndonkam bakla, u Bah Titos ula ong ba kane ka jingsiew ka dei kaba tang shisien bad ka dei tang ka dak ban tynrong ia ka jingkitkhlieh namar ba u dei uba khlieh ia ka Tnad.
“Ka Inquiry Committee kala lap ba u CFO u khlem donkti satia ha ka kam bamsap” ula ong.
