Shillong Naitung 10: Ka Federation of All Meghalaya Adhoc Secondary Teachers Association (FAMASTA) kala pynpaw iaka jingsngewnguh iaka sorkar jylla halor ka rai pynkiew tulop nonghikai ia ki Nonghikai Adhoc hynrei ka iengskhem ban dawa na ka sorkar jylla ba ka dei ban ithuh noh iaki nonghikai skul Adhoc kum ki Deficit.
Ka President jong ka FAMASTA ka kong B Kharumnuid ka la ong ba hadien ba ka sorkar jylla kala pynbna ban pynkiew iaka tulop jong ki nonghikai da T.9000 ha ka 4 tarik Naitung, ki nongialam ka seng kiba iakynduh haka 7 tarik kila pynpaw iaka jingsngewnguh ba ka sorkar kala pynkiew iaka tulop jong ki nonghikai Adhoc.
Kane ka nongialam ka la ong, ka FAMASTA kala dawa naka sorkar jylla naduh na u Myntri Rangbah ka jylla, u Myntri ka Pule Puthi bad na ki heh ophisar sorkar, ba dei ban pynkiew 100% iaka tulop jong ki nonghikai Adhoc hynrei ka sorkar kala pynkiew tang 50% kaba la pynkyndit iaka seng bad ia ki nonghikai bad watla ka sorkar kam shym la lah ban pynkiew iaka tulop kumba la dawa, hynrei ka FAMASTA kan pdiang beit ia kaei kaba ka ioh.
Ka Kong Kharumnuid kala pyntip ba ka FAMASTA ka ieng skhem beit halor ka jingdawa ba ka sorkar jylla kadei ban ithuh noh ia ki nonghikai skul Adhoc kum ki Deficit.
Ki nongialam ka FAMASTA kila pynpaw ba watla kila mad ia ki jingeh ban pyndap pynbiang iala ka ïing ka sem namar ka jingkiew dor lut ki marbam mardih hynrei kim shim la pynlong satia ia kano kano ka jingiakhih da kaba pyrkhat janai ba ki khynnah skul ha ki snem kiba la dep kim shym la ioh iaka lad ban shong skul hynrei kila iaid da ka lynti da kaba shu leit iakynduh ia ki heh sorkar ban pynkynmaw iaka jingdawa ka jongki.
Nalor kane,haba ki leit iakynduh ia ki heh sorkar, kim ju khot ruh iaki nongpathai khubor katba kim pat ioh iaka jubab kaba paka na ki heh sorkar ne na u Myntri Rangbah ka jylla.
Ki nongialam ka FAMASTA kila ong ba ka seng kan sa iai bteng beit ban dawa na ka sorkar jylla ban pynkiew iaka tulop kumba kila dawa bad kila kyntu ruh ia ki nonghikai hapoh ka lama jong ka FAMASTA ba kin long kiba iai neh bad ban shaniah skhem ha ki nongialam kiba iakhun tyngeh naka bynta ka jingmyntoi jong baroh ki nonghikai haduh ban da ioh jingithuh kum ki Deficit.
