Imphal, Naitung 09 : U Heh Pulit ka Manipur ula pyntip ba ka Sorkar Jylla kala bthah ban ai bor pahara ia ki paid nongrep kiba kwah ban leit sha ki jaka rep ban rep ban riang.
Ia kane la pyntip da u Inspector General of Police I K Muivah ha ka jingiakynduh bad ki lad pathai khubor ha ka sngi Saitjain bad ong ruh ba namar mynta ba ka aiom bet ia ki marrep kala jan kut, ka Tnad Pulit kan ai pahara ia ki nongrep kiba kwah ban leit rep leit riang.
U IGP ula pyntip ba ka Sorkar dang shen kala pynduna ia ka jingdon ki bor pahara ban pahara ia ki heh ki hain bad kin pyndonkam noh ia ki ha kaban ai pahara ia ki nongrep kiba leit rep leit riang.
Hynrei ula ong ba ki nongrep ki dei ban iakren bad ki Superintendent of Police hala ki jong ki District hashuwa ba kin mih ban leit shala ki jong ki jaka rep. Ula ong ba ki nongrep kim dei ban leit sha ki jaka rep lada kim pat ioh ia ki bor pahara.
U IGP ula pyntip ba ka Tnad kan buh ia 822 ngut ki Pulit ki ban lei tai pahara ia ki nongrep ha Imphal West District, 290 ngut ha Imphal East, 236 ngut ha Bishnapur, 147 ha Thoubal, 204 ha Kakching, 200 ha Kangpokpi bad 300 ngut ha Churachandpur District.
Une u Heh Pulit u pyntip ba ha kine ki 24 kynta bala leit noh, ki Pulit ka Jylla bad ki shipai kila pynlong ia ka jingkhynra ha kiba bun ki jaka jong ka Churachandpur District, Bishnapur bad Kangpokpi District.
