Mairang, Naitung, 04: Kum shibynta ban kyntiew ia ka kam pule puthi lyngba ka jingpyndonkam ia ki bor teknoloji, ka ophis ka Block Development Officer, Mairang C&RD Block, Mairang hynne ka sngi Baar, kala sam ia ki M-Tab hapoh ka skhim Chief Minister’s Digital Learning Aid Scheme sha ki samla pule klas XI jong u snem 2022-2023.
Ia kane ka prokram la pynlong ha St. Thomas Higher Secondary School, Mairang bad la pynshongkun ia ka da ka jingia donlang u Chairman ka Meghalaya State Planning Board (MSPB) bad MLA ka Mairang Bah Metbah Lyngdoh kum u Kongsan ha ka jingiadonlang u DC Bah G Kharmawphlang kum y Symbud kongsan bad ka BDO ka Mairang Dr LR Hynniewta.
Haba ai jingkren, u Bah Metbah Lyngdoh ula ong ba ki khynnah pule ki long ka lawei jong ka imlang sahlang bad kumta ki dei ban trei minot ban ia ryngkat bor bad ki khynnah pule na kiwei pat ki bynta jong ka pyrthei ha ka rukom pyndonkam ia ka kor teknoloji ha ka pule puthi bad ula kyntu ba kin pdiang ia kiei kiei kiba bha ba ka bor teknoloji ka wanrah ha ka imlang sahlang .
Ula ong, ba ka long ka kabu kaba khraw ia ki khynnah pule ba kin iohpdiang ia kiba kum kine ki lad jingiarap kiba ka sorkar ka ai khlem kano kano ka jingsiew pisa bad ula kren ruh shaphang ka jingkyrduh kam kyrduh jam kaba long kawei na ki mat kaba donkam bha ban iatai ha ka ri bad ka jylla bad ula kyntu ba ym dei ban khmih lynti tang ia ki kam sorkar hynrei ban thawlad ia kiwei pat ki rukom kamai jakpoh.
Katba, u Bah G. Kharmawphlang ula kyntu ia ki khynnah pule kiba la ioh pdiang ia ki M- Tab ba kin pyndonkam hok iaki na ka bynta ban kyntiew shuh shuh ia ka pule puthi ka jong ki.
Ha kane ka sngi la sam ruh ia ki khusnam ia ki nongjop ha ka jingiakob dro jingdro bad jingiakob thoh poitri ia kiba la pynlong kum shibynta jong ka jingrakhe ia ka sngi pynneh mariang mynta u snem.
Pule ruh: SSA Women’s League : Pynliem ka Mawlai haduh 14-0 kol ia ka Synroplang
