Imphal, Naitung 2: Ha ka jingjia iaumsnam ba dang shu jia ha Manipur, lai ngut ki dkhot ka Village Defence Force (VDF) kila shah siat iap bad san ngut kila mynsaw ha ka kynhun ki kaikhlaw kiba la wan hiar thma hynne ka step Sngi U Blei ia ka shnong Khajuma Tabi kaba hap hapoh ka Bishnapur District.
Kat kum ka khubor, kine ki 5 ngut kila mynsaw jur bad la pynkit mar mar ia ki sah Hospital ban ai jingsumar.
“Ki dkhot ka VDF ki dang pahara ia ka shnong namar ka thma iapher jaidbynriew hapdeng ki Meitei bad ki Kuki. Lai ngut kila iap hashen” ong ki bor Sorkar.
Ha ka sngi Saitjain, ka Lat Anusuiya Uikey kala kyrpad ia ki paidbah na baroh ki jaidbynriew ba kin iarap lem ia ka Sorkar bad ki bor shipai ba kin wanrah pat ka jingshongsuk hapoh ka Jylla.
“Nga, ngaduh ka mynsiem, nga kyrpad ia phi baroh, khamtam ki Kmie bad ki Para Kynthei ba phin kiar na ka jingkhang lynti ia ki shipai ha ki surok katba ki dang trei iala ka kamram ban iada ia ki paidbah” ong ka Lat ha ka khubor sha ki paidbah.
Ha kajuh ka por, ki bor shipai kila hiar mar mar sha ka shnong Khajuma Tabi bad pynlong ia ka jingkhynra kaba jur ban ioh kem ia ki kaikhlaw.
Ha kajuh ka por, ki nongshongshnong kila thmu ban wanrah ia ka metiap jong kine ki dkhot ka VDF sha sor Imphal ban dawa b aka Sorkar kan ai ia ka jingbishar kaba hok.
Pule lang ia kane: Kem ki Pulit Ri-Bhoi ia 3 ngut ki snar khaii droks, kurup droks ba shongdor T. 5 klur
