Shillong, Jylliew 02 : Ka Uniform Civil Code (UCC) ha India ka dei kawei na ki mat ba la thnem bha ha ka jingiatai mynta bad shibun ki jingkynthoh kila mih na ki kynhun bapher bapher kynthup ki nongialam seng sain pyrthei bad ki Political Party.
Ka Uniform Civil Code ka dei kawei ka sobjek kaba la don ha ka rynsan iatai lah da ki phew snem ha kylleng ki bynta jong ka Ri India khamtam ha ki jaka ba don ki paid riewlum ka Ri.
Kaei ka jingthmu ha lyndet ka UCC?
Ka jingthmu ba hakhmat eh bad ba ha lyndet ka UCC ka long ban don ia kijuh ki ain ki ban khmih ia ki kam shimet kum ka jingting khun, jingai pateng, ka jingiathoh shongkurim, ka jingiapyllait san shyieng ia baroh ki nongshongshnong ka Ri, kam pher ki dei na ka Niam aiu aiu ruh.
Namar ka India ka dei ka Riti Synshar paidbah bad kaba don ia ki Jaidbynriew bapher bapher kiba don hala ki jong ki jingngeit bad ki niam ba ki bud, ka don ia ki ain shimet bapher bapher jong ki niam.
Uniform Civil Code: Kaei kaba ka Riti Synshar ka Ri ka ong halor ka UCC?
Ka Article 44 jong ka Riti Synshar ka Ri, ka ong ba ki Jylla ki dei ban pyrshang ha kaban wanrah ia ka Uniform Civil Code ia la ki nongshongshnong. Wat, ka jingiakren bad iatai halor ka jingpyntreikam ia ka UCC kala iaid da ki phew snem, hynrei ka dang iai long ka kam kaba dang kynrum kynram bad ba dang pynktha maloi ha ka kam sain pyrthei.
Kumno ka UCC kan ktah ia ki Jylla ka thain Shatei Lam Mihngi ka India bad kumno ki Nongialam ka Thain ki ong
Haba iatip ba haduh 12 percent ki paid riewlum ka Ri India ki dei kiba im ha ki Jylla ka Thain Shatei Lam Mihngi, ki paid nongshongshnong hangne ki don iala ki jong ki hok halor ka tynrai bad ki riti dustur nalor ki jingngeit jong ki, kiba la burom da ka Ain jong ki Jylla.
Meghalaya
Hangne, u Myntri Rangbah ka Jylla Conrad K Sangma uba dei uwei na kiba iatreilang bad ka Bharatiya Janata Party (BJP) ula ong “Ka UCC kala iaid pyrshah ia ka jingmut tynrai jong ka Ri India baroh kawei”. Ula ong “Kum ka Seng sain pyrthei ngi sngewthuh ba ka Thain Shatei Lam Mihngi ka don ia ki riti dustur ba pher tam. Ngi kwah ba kine ki riti tynrai kin neh kumba ki long bad ba ym ban ktah ia ki”.
Nagaland
Ka party ba iatreilang bad ka BJP ha Nagaland, kaba bat ia u lakam ka jingsynshar-ka Nationalist Democratic Progressive Party (NDPP) ha ka sngi Saitjain, kala ong “Ka jingpyntreikam ia ka UCC kan ktah jur eh ia ka jinglaitluid bad ka hok jong ki jaidbynriew ritpaid bad ki paid riewlum ka ri India”.
Mizoram
Ki paid riewlum ba bun paid eh ki shong shnong ha Mizoram, kaba la kot palat 94 percent, bad kine ki riewlum ha u bnai Rymphang 2022, kila pynskhem ia ka nongrim ban pyrshah jur ia ka UCC.
Ha kajuh ka por, u Myntri kam Pohiing ka Mizoram Lalchamliano ha ka sngi Thohdieng bala lah, ula ong ba ka Uniform Civil Code, wat lada la pynlong ain ha Parliament, kan ym treikam satia ha Mizoram tad haduh ba ka Iingdorbar Thaw Ain ka Jylla kala shim rai hi lyngba ka Resolution.
Assam
Hynrei, ha Assam, ka AGP kaba iatreilang bad ka BJP kan dang ban iakren ia ka nongrim ba kan shim halor ka UCC ha ka sngi Ba-ar ban wan.
Watla, u Myntri Rangbah ka Jylla Himanta Biswa Sarma ula ong ba da ka jingpyntreikam ia ka Uniform Civil Code (UCC), ka jingleh niam ban ri lok palat ia kawei ka lok kan sa kut noh. Ula pynpaw ia kane haba kren ha ka “Hindu Ekta Yatra” bala pynlong da u President ka BJP na Telangana bad MP Lok Sabha Bandi Sanjay Kumar ha Karimnagar.
Sikkim
Ha Sikkim, ka Joint Action Council (JAC) kala pynpaw ba kan sa iakren halor ka jingpyntreikam ia ka Uniform Civil Code (UCC) hapoh ka Jylla da kaba pyniadonbynta lang ia ki seng sain pyrthei bad ki seng bapher bapher ka Jylla.
Ia kane ka jingiakren yn sa pynlong lyngba ka Symposium kaba la buh ban long ha ka 2 tarik Naitung ha Gangtok. Ka jingthmu jong kane hi ka long ban ioh ia ki jingai jingmut na ki kynhun bapher bapher, ia kaban sa pynbud da ka jing phah ia kine ki jingai jingmut sha ka Law Commission of India.
Pule lang ia kane:Â Kem ki Pulit Ri-Bhoi ia 3 ngut ki snar khaii droks, kurup droks ba shongdor T. 5 klur
